काठमाडौं । महोत्तरीमा ६ वर्षीया बालिकाको बलात्कार पछि हत्या गरेको भन्दै आक्रोशित स्थानीयले आरोपीको घरमा आगो लगाइदिएका छन् ।
आइतबार साँझदेखि हराएकी बर्दिवास नगरपालिका–१४ का शहीद आलमकी ६ वर्षीया छोरी गुलाव साह खातुनको शव प्रहरीले सोमबार मध्यराति फेला पारेको थियो ।
बालिकाको बलात्कार पछि हत्या गरेको आरोप लागेका गौशाला नगरपालिका–५ का २५ वर्षीय अरुणकुमार साहको घरमा मंगलबार बिहान स्थानीयले आगो लगाएका हुन् । साहलाई प्रहरीले पक्राउ गरेको छ । आरोपीले घटना स्वीकार गरेका प्रहरीले जनाएको छ ।
आरोपित युवकको घरमा ढुंगामुढा गर्नुको साथै किराना पसल भएको घरमा आगो लगाएका हुन् । आक्रोशित स्थानीयले अहिले बर्दिबासमा प्रदर्शन गरिरहेका छन् । स्थिति नियन्त्रमा लिन प्रहरीले दर्जनौं सेल अश्रु ग्यास प्रहार गरेको छ।
घरआँगन वरपर खेलिरहेकी खातुन आइतबार साँझ अचानक हराएपछि परिवारजन र प्रहरीले उनको खोजी गरिरहेको थियो । बालिकाको शव बर्दिवास–१४ कै शुभम बस्ती नजिकको झाडीमा बोरामा खाँदेको अवस्थामा फेला परेको थियो ।
बालिकाको शव परीक्षणका लागि प्रादेशिक अस्पताल जनकपुरधाम पठाइएको छ । प्रहरीले शव परीक्षणपछि थप कुरा खुल्दै जाने जनाएको छ ।
