काठमाडौं । जनकपुरमा भएको एसिड प्रहार घटनाकी पीडित आरती साहले आफुमाथि पहिले पनि करेन्ट लगाएर यातना दिएको बताएकी छन् । जनकपुरधाम उपमहानगरपालिका–२० रुपैठाकी २१ वर्षीया आरती साहलाई शनिबार उनका श्रीमान सञ्जीव साहले एसिड खन्याएका थिए ।

उनी तीन वर्षीया छोरीसँगै कीर्तिपुर अस्पतालमा छटपटाइरहेकी छिन् । एसिड लागेर उनको शरीरको आधा भाग जलेको छ । छोरी रियाको शरीरमा पनि एसिड परेको छ ।

जनकपुरधाम उपमहानगरपालिका वडा नं ७ जानकीनगर माइती भएकी आरतीको चार वर्षअघि सञ्जीव साहसँग सामाजिक परम्पराअनुसार विवाह भएको थियो।

विवाह भएको केही समय पश्चात नै सञ्जीव रक्सी खाएर घर आउने र आफूलाई कुटपिट गर्ने गरेको आरतीले बताइन् । शनिवार श्रीमती र छोरीमाथि एसिड प्रहार गरेकाका २४ वर्षीय साहलाई घटना लगत्तै प्रहरीले पक्राउ गरेको थियो ।

अस्पतालमा छटपटाइरहेकी आरतीले पहिले आफूलाई करेन्ट लगाइएको र एक दिन मट्टितेल खन्याएर आगो लगाउने प्रयास गरेको बताइन् ।

बारम्बार यातना दिँदा पनि घरमै सहेर बसेको तर, सञ्जीवका पिताले समेत आफूमाथि गलत नजर राख्न थालेपछि घर छाड्न बाध्य भएको आरतीले प्रहरीसँग बताइन् ।

एसिड आक्रमणपछि तत्कालै आमा छोरीलाई जानकी हेल्थ केयरमा उपचारका लागि भर्ना गरिएको थियो । आरतीको अवस्था गम्भीर भएकाले चिकित्सकहरूले कीर्तिपुर अस्पताल रेफर गरेका थिए ।

५८ बोतल एसिडसहित एक व्यापारी पक्राउ
एसिड प्रहार घटनामा प्रहरीले अनुसन्धान गर्ने क्रममा ५८ बोतल एसिडसहित एक ब्यापारी पक्राउ परेका छन् । स्थानीय व्यापारी नागेन्द्र साहलाई प्रहरीले पक्राउ गरेको हो ।

श्रीमती र छोरीमाथि एसिड प्रहार गर्नेलाई पक्राउ गरेर अनुसन्धान गर्दै जाँदा एसिडका बिक्रेतालाई पनि पक्राउ गरेको प्रहरीले जनाएको छ ।