खुम रायमाझी, कुवेत
भिसाको म्याद सकिएको अवस्थामा कुवेतमा रहेका विदेशी नागरिकहरुले जरिवाना तिरेर वैधानिकता पाउन सक्ने भएका छन् । कुवेतस्थित नेपाली दूतावासले सूचना प्रकाशित गरी आन्तरिक मामिला मन्त्रालयबाट जारी कुवेतको आवासीय कानून उल्लंघनकर्ताहरूको वैधानिकता कायम हुनसक्ने सम्बन्धी नियमबारे जानकारी गराएको छ ।
‘कुवेत सरकारको सम्बन्धित निकायहरूले जारी गरेको यात्रा प्रतिवन्ध (ट्राभल वान) मा परेका बाहेक कुवेतको आवासिय भिसा (रेजिडेन्सी) समाप्त भएका तथा ०१ जनवारी २०२० वा सो मिति भन्दा अघि प्रवेश भिसा (इन्ट्रि भिसा) लिई कुवेत आएका विदेशी नागरिकहरूले कानूनी अनुसन्धानको दायरामा नपरी आफ्नो कानूनी वैधता कायम राख्न वा कुवेत छोडी स्वदेश फिर्ती जान ०१ डिसेम्बर २०२० देखि ३१ डिसेम्बर २०२० सम्म ‘पब्लिक एडमिनिस्ट्रेन अफ रेजिडेनसी अफेयर’ कानून बमोजिम तोकिएको जरिवाना तिर्न सक्नेछन्’ सूचनामा भनिएको छ।
यस्तै, ‘माथि तोकिएको अवधि भित्र आवासीय कानून उल्लङ्घनकर्ता विदेशी नागरिकहरूले आफ्नो कानूनी वैधता कायम गरेको नपाइएमा निजहरूलाई कुवेत सरकारको कानून बमोजिम जरिवाना हुने, निजहरूले आवासीय भिसा प्राप्त गर्न नसक्ने र कुवेतमा पुनः फर्कन नसक्ने गरी डिपोर्ट गरिने’ पनि सूचनामा जनाइएको छ।
वैदेशिक रोजगारीका लागि उल्लेख्य संख्यामा नेपालीहरु रहेको कुवेतमा सरकारको सो निर्णयबाट नेपाली पनि लाभान्वित हुनसक्ने विश्वास लिइएको छ ।
