काठमाडौं । राष्ट्रपति विद्यादेवी भण्डारीले राष्ट्रिय जनमोर्चाका अध्यक्ष चित्रबहादुर केसीको स्वास्थ्य अवस्थाप्रति चासो राख्नुभएको छ । राष्ट्रपति कार्यालयले राजमो उपाध्यक्ष एवं प्रवक्ता दुर्गा पौडेललाई सम्पर्क गरी अध्यक्ष केसीको स्वास्थ्यप्रति चिन्ता जाहेर गरेको हो ।
राष्ट्रपति भण्डारीले अध्यक्ष केसीको स्वास्थ्यलाभको कामना गरेको कार्यालयले जनाएको छ ।
राष्ट्रपति कार्यालयका सचिवलाई उदृत गर्दै उपाध्यक्ष पौडेलले युगदर्शनसँग भन्नुभयो, ‘राष्ट्रपतिज्यूले अध्यक्ष केसीको स्वास्थ्य अवस्थाप्रति चासो राख्नुभएको छ । उहाँले केसीको सीघ्र स्वास्थ्य लाभको कामनासमेत गर्नुभएको छ ।’
पेटको समस्या, डायरिया, निमोनिया, कोरोना संक्रमण जस्ता रोगबाट जुधिरहनुभएका केसीको पाटनको मेडिसिटी अस्पतालमा उपचार भइरहेको छ । उहाँको अवस्थामा केही सुधार भएपनि अझै गम्भीर रहेको छोरी भानु केसीले बताउनुभएको छ ।
पूर्व उप प्रधानमन्त्रीसमेत रहेका अध्यक्ष केसीको उपचार खर्च सरकारले नै ब्यहोर्ने मन्त्रिपरिषदले निर्णय गरेको छ ।
राष्ट्रीय जनमोर्चाका अध्यक्ष, संविधानसभाका सदस्य, पूर्व उपप्रधानमन्त्री चित्रबहादुर केसीज्यूको शिघ्र स्वास्थ्यलाभको कामना गर्दछु। आज सम्पन्न मन्त्री परिषदको बैठकले उहाँको सम्पूर्ण उपचार खर्च बेहोर्ने निर्णय गरेको पनि अवगत गराउँछु।
— Bishnu Prasad Paudel (@bpaudel1959) November 12, 2020
राजनीतिमा स्वच्छ छविको आइकन मानिनुहुने अध्यक्ष केसीको स्वास्थ्यलाभको कामना गर्दै विभिन्न राजनीतिक दलका नेता, पार्टी समर्थक, शुभचिन्तक तथा सर्वसाधारणले चासो व्यक्त गरिरहेका छन् ।
यो पनिः ‘बुबा र पार्टीको विरुद्ध भाइलाई उपयोग गरियो’
