काठमाडौँ । जनकपुरमा वृद्ध दम्पत्तिको पाँच मिनेटको फरकमा मृत्यु भएको छ । धनुषाको सहिदनगर नगरपालिका–१ कुम्भकर्ण टोलका ९१ वर्षीय रामखेलावन यादव र उनकी ८८ वर्षीया श्रीमती सुमिन्त्रादेवी यादवको पाँच मिनेटको अन्तरमा मृत्यु भएको हो ।

रामखेलावनको बिहान ७ बजेर ४५ मिनेटमा मृत्यु भएको थियो भने श्रीमती सुमिन्त्रादेवीले ७ बजेर ५० मिनेटमा प्राणत्याग गरिन् ।

स्थानीयका अनुसार सधैँ झैँ बिहान उठेर नित्यकर्म गरी चिया खाँदै गफिएका श्रीमान्–श्रीमतीमध्ये श्रीमानको एक्कासी छाती दुखेर मृत्यु भएको थियो भने श्रीमानको मृत्युपछि बेहोस भएर ढलेकी श्रीमतीको पनि पाँच मिनेटपछि मृत्यु भएको थियो ।

एक छोरा र चार छोरीका बुवाआमा रहेका यी वृद्ध दम्पत्तिको मृत्युको संयोगलाई स्थानीयले अनौठो संयोगका रुपमा लिएका छन् । स्थानीयका अनुसार दुवै बुढाबुढीको तामझामका साथ एउटै चिता बनाएर अन्त्येष्टि गरिने छ ।