काठमाडौँ। नेपालमा २०७७ वैशाखयता बिपतका घटनाबाट ४६५ जनाको मृत्यु भएको छ ।
राष्ट्रिय जोखिम न्यूनीकरण तथा व्यवस्थापन विभागका अनुसार हालसम्म १०१ जना बेपत्ता भएका छन् भने ८१० जना घाइते छन् ।
सबैभन्दा बढी पहिरोबाट २९५ जनाको मृत्यु भएको छ । यस्तै, पहिरोमा परी ६४ जना बेपत्ता छन् भने २२३ जना घाइते भएका छन् ।
यस्तै, चट्याङबाट ६५ जनाको मृत्यु भएको छ भने २१३ जना घाइते भएका छन् । बाढीबाट ४२ जनाको मृत्यु भएको छ भने ३७ जना बेपत्ता भएका छन् । ११ घाइते छन् । यसैगरी सर्पदंशबाट २१ जनाको मृत्यु र ३८ जना घाइते छन् ।
विभागले सार्वजनिक गरेको तथ्याङ्कमा आगलागीबाट १३ जनाको ज्यान गएको छ भने १५४ जना घाइते भएका छन् । जनावरको आक्रमणबाट १४ को मृत्यु र ११५ घाइते भएका छन् ।
त्यसैगरी अविरल वर्षाबाट १५ को मृत्यु र ५६ जना घाइते भएका छन् ।
बिपतका विभिन्न घटनाबाट हालसम्म दुई हजार तीन सय दुई वटा जनावरको मृत्यु भएको छ भने करिब ८६ करोड १० लाख ६८ हजार ८१० रुपियाँ बराबरको क्षति भएको छ ।
