काठमाडौं । नेपाल–भारत सीमा क्षेत्रस्थित भारतको जोगवनीमा नेपाली युवाको शव भेटिएको छ । विराटनगर महानगरपालिका–१६ दक्षिण गेटबाट लगभग सय मिटर पर भारततर्फ शव भेटिएको हो।

हत्या भएको आशंका गरिएका युवाको पहिचान भने खुल्न बाँकी छ। सीमा क्षेत्रका बासिन्दाले मृतक युवा सुनसरी इटहरीका भएको बताएका छन् ।

भारतीय भूमिमा अन्दाजी २५÷२६ वर्षीय युवाको शव फेला परेको तर आफन्त कोही सम्पर्कमा नआइसकेकाले पहिचान हुन नसकेको प्रहरीले जनाएको छ ।

स्थानीयका अनुसार ती युवा लागुऔषध सेवन गर्न जोगवनीतर्फ जाने गर्दथे । उनको अत्यधिक लागुऔषध सेवनका कारण मृत्यु भयो वा हत्या हो भन्ने सम्बन्धमा भारतीय प्रहरीले अनुसन्धान सुरु गरेको जनाइएको छ ।

भारतीय भूमिमा शव भेटिएकाले अनुसन्धान पनि भारतीय प्रहरीले नै गर्ने र त्यसका लागि नेपाल प्रहरीले आवश्यक सहयोग गर्ने स्थानीय प्रहरीले जनाएको छ ।