श्यामलाल पोखरेल, बुटवल ।
उपचार खर्चको अभावमा एक वर्षदेखि भाँचिएको हात लिएर बसेका बुटवलका एक बालकको उपचार सुरु भएको छ । राष्ट्रिय उद्योग व्यापार संगठन रुपन्देहीका अध्यक्ष तथा केन्द्रीय सदस्य नेत्र आचार्यको सहयोगमा बालकको उपचार सुरु भएको हो ।
बाग्लुङको बुर्तिवाङस्थित ढोरपाटन घर बताउने नौ वर्षीय बालक विष्णु खत्रीको गत वर्षको मंसिरमा दाहिने हात भाँचिएको थियो । बुटवलस्थित ज्ञानोदय माध्यामिक विद्यालयमा अध्ययनरत खत्रीको खेल्ने क्रममा साथीले घचेटेर लडेपछि हात भाँचिएको उनले बताएका छन् ।
दाहिने हातको कुमबाट उनको हात भाँचिएपछि लुम्बिनी प्रादेशिक अस्पतालमा अप्रेसन गरी हात सिधा बनाउन रड राखिएको थियो । आर्थिक अभावका कारण हातमा राखिएको रड निकाल्ने समय भएपनि निकालिएको थिएन ।
बालकका बाबु आमा बुटवलमा मजदुरी काम गरेर जीवन निर्वाह गर्दै आएका छन् । बुटवल कालिकानगरको सडक पेटिमा बस्दै आएका बालकको उपचारका लागि सिद्वार्थनगर उद्योग वाणिज्य संघका महासचिवसमेत रहनुभएका नेत्र आचार्यले आफ्नो जन्म दिनको अवसरमा तत्कालका लागि रु १० हजार दिएपछि उपचार सुरु भएको हो ।
जन्मदिनमा फजुल खर्च नगरी बालकको उपचारमा सहयोग गरेको व्यवसायी आचार्यले बताउनुभयो । हातको उपचारका लागि पैसा अभाव भए अस्पतालमा लाग्ने आवश्यक पैसा सहयोग गर्ने समाजसेवी तथा व्यवसायी आचार्यले प्रतिवद्वता जनाउनुभएको छ ।
भैरहवाका उद्योगी एवं व्यवसायी क्षेत्रका नेता आचार्यले गरिब दुखी तथा निमुखाहरुलाई आर्थिक र भौतिक रुपले सहयोग गर्दै आउनुभएको छ ।
आचार्यले आर्थिक सहयोग गरेपछि बालक विष्णु खत्रीको सोमबारदेखि बुटवलको तिनाउ अस्पतालमा डाक्टर योगेन्द्र अग्रहरीले उपचार सुरु गर्नुभएको छ । आचार्यको सहयोगपछि विपन्न परिवारका बालक खत्रीले नयाँ जीवन पाउने भएका छन् । डाक्टर योगेन्द्र अग्रहरिले निःशुल्क अप्रेशन गरेर सहयोग गर्नुहुने भएको छ ।
त्यस्तै बालकको उपचारका लागि बुटवल ११ का इश्वर भुसालले ३, हजार, यमबहादुर खत्रीले २ हजार र बुटवल ६ चन्द्रनगर निवासी रेनुसिंह क्षेत्रीले २ हजार आर्थिक सहयोग गर्नुहुने भएको छ ।
