काठमाडौं । कञ्चनपुरको पुनर्वास नगरपालिका वडा नम्बर ४ कार्यालयको भवन निर्माण सुरु भएको छ । ८९ लाख ६२ हजार ३९५ रुपैयाँ लागतमा निर्माण भइरहेको भवन आउँदो असार १५ भित्र भवन सम्पन्न गरिसक्ने योजना रहेको वडा कार्यालयले जनाएको छ ।

स्थानीय कालिका मन्दिरले चर्चेको करिब एक विघा जग्गामा भवन निर्माण गर्न लगिएको हो । भवन निर्माणको जिम्मा रश्मी बिल्डर्स प्रालिले लिएको छ ।

विगतमा वडा भेला र नगर परिषदबाट निर्णय भए अनुरुप नै भवन निर्माण गर्न लागिएको वडाअध्यक्ष प्रेम बस्नेतले बताउनुभयो । पुनर्वास कम्पनीको नाममा रहेको तथा विद्यालयको छेउमा रहेका कारण मन्त्रिपरिषदबाट स्वीकृति लिई भवन निर्माण गर्न लागिएको उहाँले जानकारी दिनुभयो ।

वडा कार्यालयको आफ्नै भवन बनेपछि वडा कार्यालयबाट प्रदान गरिने सेवा सुविधामा सहजता हुने वडाबासीहरु बताउँछन् ।