काठमाडौं । कर्णाली प्रदेशका मुख्यमन्त्री महेन्द्रबहादुर शाहीलाई हटाउने सत्तारुढ नेपाल कम्युनिस्ट पार्टी (नेकपा) कै एक पक्षको योजना भागबण्डापछि तुहिएको छ । पूर्व एमाले एकजुट भएर मुख्यमन्त्री शाहीलाई संसदीय दलको नेताबाट हटाउन बुनेको योजना प्रचण्ड र नेपाल पक्षका नेताहरुबीच भागबण्डा मिलेपछि तत्कालका लागि टरेको हो ।

मुख्यमन्त्री शाहीविरुद्ध पूर्व एमाले समूह एक ढिक्का भएर अविश्वासको प्रस्ताव अघि सारिएपनि माधव नेपाल समूहलाई प्रचण्ड पक्षले संसदमा सचेतक र केही मन्त्री दिएर आफ्नो पक्षमा पार्न सफल भएपछि ओली समूह एक्लिएको हो ।

कर्णाली प्रदेशका ४० सांसद मध्ये तत्कालीन एमालेले २० सिट जितेको थियो जसमा माधव नेपाल पक्षधर ७ जना छन् । माओवादीले १३ सिट जितेको थियो । माधव नेपाल पक्षधर प्रचण्ड पक्षसँग मिल्न जाँदा मुख्यमन्त्री शाहीको पक्षमा पुनः बहुमत पुगेको छ ।

आइतबार पूर्व एमाले नेता यमलाल कँडेल लगायत १८ सदस्यले मुख्यमन्त्री विरुद्धको अविश्वासको प्रस्तावका लागि हस्ताक्षर जुटाएर प्रस्ताव नै दर्ता गरेका थिए । जसमा ओली समूहका ८, नेता नेपाल समूहका ७ र पूर्व माओवादी केन्द्रकै ३ सांसदले हस्ताक्षर गरेका थिए । त्यसपछि शाहीले केन्द्रमा प्रचण्ड र माधव नेपाललाई गुहारेका थिए । यसबीचमा सक्रिय भएका प्रचण्डले माधव नेपालसँग छलफल गरी भागबण्डा मिलाएका हुन् ।

त्यस लगत्तै शाहीले सोमबार मुख्य सचेतक गुलावजंग शाहलाई हटाएर उनको ठाउँमा प्रमुख सचेतकमा सीता नेपालीलाई नियुक्ति गरे । त्यसको भोलिपल्ट अर्थात मंगलबार सचेतकमा अर्का सदस्य कुर्मराज शाहीलाई नियुक्त गरे । शाही अविश्वास प्रस्तावमा हस्ताक्षर गर्नेमध्येका एक नेता पनि हुन् । हस्ताक्षर गर्ने नेता नै शाहीको पक्षमा लागेपछि अविश्वासको प्रस्ताव तुहिएको हो ।

यस्तै, मुख्यमन्त्री शाहीले नेता नेपाल निकट केही नेतालाई मन्त्री बनाउने तयारी गरेको पनि बुझिएको छ । नेता नेपाल निकट भौतिकमन्त्री खड्गबहादुर खत्री बैंकिङ कसुरमा मुछिएपछि उनी बर्खास्त भएका थिए । सो मन्त्रालय मुख्यमन्त्री शाहीले आफैँसँग राखेका छन् ।

दुई पक्षबीचको भागबण्डा मिलेपछि नेकपाको कर्णाली प्रदेशमा देखिएको विवाद तत्कालका लागि सामसुम भएको छ । तैपनि नेता यामलाल कँडेलले अब कस्तो रणनीति चाल्नेछन् भन्ने हेर्न बाँकी नै छ । पार्टीका शीर्ष नेताहरु अध्यक्षद्वय केपी ओली र प्रचण्डले मुख्यमन्त्री शाही, यामलाल कँडेलसहित कर्णाली प्रदेशका पार्टी पदाधिकारीहरुलाई विवाद समाधानका लागि छलफल गर्न भन्दै बिहीबार काठमाडौं बोलाएका छन् ।

यद्यपी नेकपाको एकीकरण नै भागबण्डाबाट भएको हो । नेकपाभित्र बेला मौकामा देखिने विवादको निरुपण गर्न पनि भागबण्डाकै रणनीति अपनाइने गरिएको छ । पार्टी केन्द्रले विकास गरेको भागबण्डाको संस्कृति अहिले तत्ला समितिहरुलेसमेत अनुशरण गर्न थालेका छन् ।
एकीकृत पार्टीको केन्द्रीय समिति, स्थायी समिति, प्रदेश कमिटी, जिल्ला कमिटी पनि भागबण्डाकै आधारमा गरिएको हो । यस्तै, प्रदेश सरकारहरु पनि भागबण्डाकै आधारमा गठन भएका हुन् ।

सोही आधारमा कर्णाली प्रदेशमा मन्त्रालयको भागबण्डा गर्नुपर्ने र आफु मुख्यमन्त्री बन्न पाउनुपर्ने नेता यामलाल कँडेलको दाबी देखिन्छ । २० सांसदको नेतृत्व गर्ने पूर्व एमालेका नेता कँडेल १३ सांसदको नेतृत्व गर्ने पूर्व माओवादीका नेता शाहीलाई सधैँ मुख्यमन्त्री स्वीकार गर्न तयार छैनन् । यद्यपी नेकपामा केन्द्रदेखि स्थानीय तहसम्म तीन गुटको अस्तित्वका कारण दुई गुट जता मिल्न जान्छन् त्यतै बहुमत पुग्ने गरेको छ ।