काठमाडौँ । भक्तपुरमा जग्गा किनबेचमा संलग्न व्यक्तिहरूबिच आपसमा कुरा नमिलेपछि एक जनाको हत्या भएको छ । हत्यामा संलग्न तीन जनालाई प्रहरीले पक्राउ गरेको छ ।

पक्राउ पर्नेमा घटनाका मुख्य योजनाकार शेर्पा भनिने कामी लामा, रमेश तामाङ र प्रेम तामाङ रहेका छन् । भक्तपुरको चाँगुनारायण नगरपालिका–८ सुडालका ६१ वर्षीय चन्द्रकुमार योञ्जनको हत्यामा संलग्न उनीहरूलाई प्रहरीले बौद्ध क्षेत्रबाट पक्राउ गरेको महानगरीय अपराध महाशाखाले बताएको छ ।

मिलेर जग्गा कारोबार गर्दै आएका उनीहरूले जग्गा हेर्ने बहानामा गत हप्ता योञ्जनलाई कुटपिट गरेका थिए । कुटपिटबाट गम्भीर घाइते योञ्जनको उपचारको क्रममा मृत्यु भएको थियो । अपराध महाशाखाका प्रमुख एसएसपी दिपक थापाले उनीहरुले जग्गा किन्ने बहाना बनाएर मृतक योञ्जनसँग रहेको सुन लुट्न कुटपिट गरेको बताउनुभयो ।

प्रहरीका अनुसार कुटपिटबाट योञ्जनको पेट, छाती र अनुहारमा गम्भीर चोट देखिएको थियो । कुटपिटपछि उनीहरू दुई तोला दुई लालको ब्रासलेट र मोबाइल लगेर फरार भएका थिए । प्रहरीले घटनास्थलमा भेटिएको हेलमेटका आधारमा अनुसन्धान गरी अपराधीहरूलाई पक्राउ गर्न सफल भएको उहाँले बताउनुभयो ।

उनीहरूको साथबाट बा९६ प७११४ नम्बरको मोटरसाइकल, सुन विक्रीबाट प्राप्त १ लाख ५५ हजारमध्ये ५४ हजार ६ सय रुपैयाँ नगद पनि र एक तोला दुई लाल सुन बरामद गरिएको छ । कर्तव्य ज्यान मुद्दा र लुटपाट अभियोमा उनीहरूलाई भक्तपुर जिल्ला अदालत लगिने प्रहरीले बताएको छ । अपरेसनमा संलग्न प्रहरी अधिकारी र जवानहरूलाई नगदसहित सम्मान पनि गरिएको छ ।