खिमराज चालिसे, चंडिगढ ।
भारतको पञ्जाव राज्यस्थित जालन्धरमा एक नेपाली युवकले आत्महत्या गरेका छन् । दाङ जिल्लाको राप्ती गाउँपालिका–४ का कुलबहादुर श्रेष्ठका छोरा २१ वर्षीय सन्तोष श्रेष्ठ (रोविन शर्मा) ले कोठाको पंखामा झुण्डिएर आत्महत्या गरेका हुन् ।
जालन्धरमा कुकको काम गर्दै आएका सन्तोषले १२ अक्टुवरमा आफ्नै कोठामा ढोका बन्द गरी पंखामा झुन्डिएर आत्महत्या गरेको अवस्थामा शव भेटिएको हो ।
उनीसँगै कोठामा बस्ने साथी केशव खनाल कामबाट कोठामा फर्केपछि ढोका भित्रबाट बन्द भएको र खटखटाउँदा नखुलेपछी झ्यालबाट हेर्दा झुन्डिएको अवस्थामा देखेका थिए । सो घटनाबारे उनले तत्काल मूल प्रवाह जालन्धर नगर समितिलाई जानकारी दिएका थिए।
लगत्तै मूल प्रवाहका सदस्यहरु घटनास्थल पुगी स्थानीय प्रशासनलाई खबर गरेका थिए । नगर सचिव दिल बहादुर गाहा र केशव खनाल लगायत मूल प्रवाहका नेता कार्यकर्ताद्वारा स्थानीय प्रशासनको उपस्थितिमा ढोका खुलाई मृतकका अभिभावकलाई भिडियोकल गरी घटनास्थल देखाइएको थियो ।
घटनास्थलको छानबिन चलिरहेपनि कुनै सुसाइड नोट नभेटिएको र थप प्रमाण नपाइएको हुँदा आत्महत्याको कारण भने खुल्न सकेको छैन ।
मृतकका दाजु नेपालदेखि हिँडिसकेको जानकारीका आधारमा उनी आएपछि पोस्टमार्टम तथा आवश्यक प्रशासनिक कार्य गर्ने गरी सन्तोषको शवलाई प्रशासनले स्थानीय सिविल हस्पिटलको शवगृहमा राखेको मूल प्रवाहका केन्द्रीय सदस्य कुलबहादुर बगालेले जानकारी दिनुभएको छ ।
