धनवीर पुन, नयाँ दिल्ली ।
नेपाल कम्युनिष्ट पार्टी (मसाल) का महामन्त्री मोहनविक्रम सिंहले पत्रकारहरुले सधैँ देश र जनताका पक्षमा कलम चलाउनुपर्ने बताउनुभएको छ ।
मूल प्रवाह अखिल भारत नेपाली एकता समाज केन्द्रीय समितिको मातहतमा रहेको प्रकाशन बोर्डले शनिबार आयोजना गरेको प्रशिक्षणात्मक बैठकलाई सम्बोधन गर्दै महामन्त्री सिंहले पत्रकारिता समाजको हित र गरिखाने वर्गको पक्षमा हुनुपर्ने बताउनुभयो ।
पार्टीका नेताहरुले गर्न नसकेका काम मिसन पत्रकारितामा लागेका पत्रकारहरुले गरिहेको स्पष्ट पार्दै उहाँले सही विचार र परिवर्तनको पक्षमा निरन्तर कलम चलाउन प्रगतिशील पक्षधर पत्रकारहरुलाई सुझाव पनि दिनुभयो । उहाँले पार्टी प्रकाशनका माध्यमबाट आम जनतालाई सचेत बनाउन पार्टी निकट पत्रकारहरुले भूमिका खेलिरहेको पनि स्पष्ट पार्नुभयो ।
‘पार्टीको ६० वर्षको इतिहासमा विभिन्न प्रकाशनहरुका माध्यमबाट एवं प्रत्यक्ष रुपमा हामी कहिले अराजकतावाद, कहिले अवसरवाद, कहिले संशोधनवाद त कहिले मध्यपन्थी विचारसँग संघर्ष गर्यौं’ सिंहले भन्नु भयो, ‘पार्टी प्रकाशनहरुलाई हामीले जुन स्तरमा रहेता पनि ठिकसँग परिचालन गर्नु पर्दछ ।’
कार्यक्रममा राष्ट्रिय जनमोर्चाका नेता आनन्द शर्माले पार्टी र क्रान्तिका लागि प्रकाशनको महत्वको बारेमा प्रकाश पार्नु भएको थियो ।
यस्तै, मूल प्रवाह अखिल भारत नेपाली एकता समाजका अध्यक्ष दुर्गाबहादुुर केसीले विगत र वर्तमानको परिदृश्यलाई ठिकसँग पहिल्याएर नै अगाडि बढ्नु पर्नेमा जोड दिनु भएको थियो ।
‘इतिहासमा हामी मासिक प्रकाशनमा सिमित थियौं, त्यस पछि साप्ताहिकमा र वर्तमानलाई मूल्यांकन गरेर नै हामीले आफ्नो प्रकाशन बोर्डको रुपमा संगठनका प्रकाशनलाई व्यवस्थापन गरेका छौं’ केसीले भन्नु भयो, ‘युगलाई ठिकसँग र परिवर्तन भएको अवस्थालाई मूल्यांकन गरेर नै प्रिन्ट संस्करण र अनलाइन संस्करण दुवैलाई अगाडि बढाएका छौं ।’
मूल प्रवाह अखिल भारत नेपाली एकता समाजको केन्द्रीय समितिको मातहतमा रहेर अझै फराकिलो र व्यापक रुपमा विस्तार गर्ने उदेश्यका साथ नै प्रकाशन बोर्ड गठन गरेको केसीले बताउनुभयो ।
मूल प्रवाहका महासचिव ठाकुर खनालले पत्रकारिता र मिशन पत्रकारिताको विषयमा प्रकाश पार्नु भएको थियो । जनताका जल्दा बल्दा समस्यालाई ठिकसँग पहिचान गर्नु र त्यसलाई समाजका बीचमा प्रस्कृत गर्नु पर्ने उहाँले बताउनु भयो ।
नेपाली एकताका सह–सम्पादक धनवीर पुनले पत्रकारितालाई पनि संगठन परिचालनको माध्यम बनाएर लैजानु पर्ने आवश्यकतामा जोड दिनुभएको थियो । पत्रकारितामा प्रवेश गरिसके पछि, आफूलाई अरु पत्रकारहरु जस्तै नभई फरक प्रकारले प्रस्तुत गर्नु पर्ने बताउनु भयो ।
कार्यक्रम समाजका केन्द्रीय सचिव प्रेम पौडेलको अध्यक्षता तथा केन्द्रीय सदस्य कुल बहादुर बगालेको सञ्चालनबाट अगाडि बढेको थियो ।
प्रकाशन बोर्डका सदस्य चन्द्रकान्त शर्माले स्वागत गर्नुभएको कार्यक्रममा ज्ञानप्रसाद शर्मा, चन्द्रकान्त शर्मा, खिमराज चालिसे, त्रिभुवन भट्टराई, राजकुमार रायमाझी, दिनेश खड्का लगायत नेताहरुले विभिन्न सुझाव दिनु भएको थियो ।
