बसन्त खड्का, अर्घाखाँची ।
अर्घाखाँची जिल्लाको खाँचीकोटस्थित भुजुंगेका पहिरो पीडितलाई राहतस्वरुप टेन्ट हस्तान्तरण गरिएको छ । स्थानीय चन्द्र प्रभा माविमा बसेका १० परिवारलाई तत्कालका लागी अस्थायी घर टेन्ट वितरण गरिएको हो ।
कार्यक्रममा पूर्व उपप्रधानमन्त्री टोप बहादुर रायमाझीले यो तत्कालीन राहत भएको र दीर्घकालीन ब्यबस्थापनका लागी आफू लागिरहेको बताउनुभयो । भूगर्भविदको टोलीको प्रतिवेदन आएपछि पीडितका लागि थप पहल गरिने आश्वासन पनि रायमाझीले दिनुभएको थियो । आज बिहानै रायमाझी भूगर्भविदको टोलीसहित भुजुङ्गे पुग्नुभएको हो ।
सो अवसरमा नेपाली सेनाद्वारा स्थानीय युवा हरुलाई टेन्ट बनाउने तरिका पनि सिकाइएको थियो । नेपाली सेनाले बनाएको एउटा नमुना टेन्ट नेता रायमाझीले पीडित भिम नेपालीलाई हस्तान्तरण गर्नुभएको थियो ।
डिहिडाँडास्थित चन्द्रप्रभा माविमा भएको कार्यक्रममा नेता रायमाझीसँगै राजमो जिल्ला अध्यक्ष थम्मन केसी, अर्घाखाँची पोखरा सम्पर्क समाजका अध्यक्ष लिला बहादुर बिसि, सन्धिखर्क वार्ड न ७ का सदस्य बिष्णु भुसाल, रामलाल खनाल, सञ्चारकर्मीहरु बसन्त खड्का, केशवराज ज्ञवाली, केशव घिमिरे लगायतको उपस्थिति थियो । कार्यक्रमको सञ्चालन चन्द्रप्रभा माविका शिक्षक तिर्थ आचार्यले गर्नुभएको थियो ।
