बागलुङ । ढोरपाटन राहत संकलन समिति कपिलवस्तुले आज ढोरपाटन नगरपालिका–९ सुकुटे पुगेर बाढी पीडितहरुलाई हस्तान्तरण गरेको छ । अघिल्लो महिना भुजिखोलामा आएको बाढीले ढोरपाटनमा जनधनको ठुलो क्षति भएपछि राष्ट्रिय जनमोर्चा कपिलवस्तुका नेता केरसिंह अदैको पहलमा कपिलवस्तुमा सहयोग संकलन गरिएको हो ।
सो सहयोग सामग्री ढोरपाटन नगरपालिका वडा नं ९ का अध्यक्ष हरि बहादुर घर्ति र वडा नं ७ का वडा अध्यक्ष दीपक थापाको रोहबरमा बिहीबार वितरण गरिएको नेता अदैले जानकारी दिनुभयो ।
९७ घर परिवार पूर्ण बिस्थापित, ४३ घर परिवार आंसिक क्षति भएका घर परिवारलाई १४० थैली चिउरा, ९७ थान कम्बल, ९७ थान सिरानी, ९७ थान च्यादर, र बिस्कुट वितरण गरिएको हो ।
बागलुङबाट बसाइँ सरी कपिलवस्तुमा बसोबास गर्नेहरुले केरसिंह अदैको संयोजक तत्व मा ११ सदस्सीय सहयोग समिति गठन गरेको थियो । सोही समितिले २ लाख १३ हजार नगद रकम जम्मा गरेर सहयोग हस्तान्तरणन गरेको अदैले बताउनुभयो । सहयोग हस्तान्तरण कार्यक्रममा संयोजक केर सिंह अदै, जुद्ध बहादुर कार्की, लोकराज गिरी सहभागी हुनुहुन्थ्यो ।
कपिलवस्तुमा दुई विद्यार्थीलाई पढाई खर्च
यसै गरी कपिलवस्तु दुई जना बाढी पीडित विद्यार्थीलाई १२ कक्षासम्मको पढाई खर्चको लागि कोष स्थापना गरिएको संयोजक अदैले जानकारी दिनुभयो ।
श्री ज्ञानोदय माध्यमिक विद्यालयमा कक्षा ९ मा अध्ययनरत बाढीका कारण घर गुमाएका ढोरपाटन नगरपालिका महेन्द्र पुन, र वडा न ८ सुप्रङकी बुबा गुमाएकी र घरबास नभएकी कक्षा ८ मा अध्ययनरत सजना विकलाई पढाउन कपिलवस्तुमा कोष स्थापना गरिएको हो ।
त्यस अवसरमा समिति संयोजक अदैले ढोरपाटनका बाढी पीडितलाई राहत जुटाउन सहयोग गर्ने सबैप्रति धन्यवाद दिनुभएको थियो ।
