काठमाडौँ । प्रदेश नं. ५ मा नेपाली काङ्ग्रेसका सांसदहरूको हिजोको व्यवहारप्रति नेपाली काङ्ग्रेसकै लोकप्रिय नेता गगन थापाले विरोध गरेका छन् । उनले हिजोको घटनाको आत्मालोचनाका साथै सम्बन्धित सांसदहरूलाई कारबाहीसमेत गर्नुपर्ने आवश्यकतामा जोड दिएका छन् ।

आफ्नो ट्विटर एकाउन्टमा सांसदसमेत रहेका थापाले लेखेका छन्– “प्रदेश ५ को संसदभित्र प्रतिपक्षबाट आज भएको व्यवहार संसदीय मर्यादा र प्रतिष्ठा विपरीत छ । संसदमा आफ्नो फरक मत राख्ने र सरकारको विरोध गर्ने अनेकन् तरिका छन् । आजको तरिका संसदभित्र पूर्णत अवाञ्छनीय छ” उनले लेखेका छन्– “हामीले यो घटनामा आत्मालोचना गर्दै गल्ती गर्नेलाई कारबाही पनि गर्नैपर्छ ।”

प्रदेश ५ को संसदभित्र प्रतिपक्षबाट आज भएको व्यवहार संसदीय मर्यादा र प्रतिष्ठा विपरीत छ । संसदमा आफ्नो फरक मत राख्ने र सरकारको विरोध गर्ने अनेकन तरिका छन्।आजको तरिका संसदभित्र पूर्णत अवाञ्छनीय छ । हामीले यो घटनामा आत्मालोचना गर्दै गल्ती गर्नेलाई कारबाही पनि गर्नै पर्छ।

— Gagan Thapa (@thapagk) October 5, 2020

त्यति मात्रै होइन, उनले आफ्ना सांसदहरूलाई पार्टीले प्रतिपक्षको भूमिका सिकाउन नसकेको पनि बताएका छन् । “प्रतिपक्षले सरकारको जस्तोसुकै नाजायज हठका विरुद्ध आवाज उठाउन पाउँछ, पाउनुपर्छ। आवाज उठाउने तरिका संसदीय अभ्यासभित्रै छ” उनले ट्विटरमा लेखेका छन्– “प्रतिपक्षको भूमिका केकस्तो हुने भन्नेमा हामीले आफ्ना नेता–कार्यकर्तालाई सिकाउन नसकेकै हो ।”

प्रदेश नं. ५ मा प्रतिपक्षले आवेग गुमाएको बताउँदै काङ्गेस नेता थापाले भनेका छन्– प्रतिपक्षले आवेगमा विवेक गुमाउँदा सरकारको असंसदीय तथा निन्दनीय व्यवहारका विरुद्ध बोल्ने नैतिक बल पनि गुमाउनुपर्छ” उनले अगाडि भनेका छन्– “नत्र मन्त्रीको “घिसारेर निकालिहाल्” को प्रतिकार यति कमजोर हुँदैनथ्यो ।”

उनले काङ्ग्रेसका सांसदहरूले आफ्नो व्यवहारप्रति विचार गर्नुपर्ने आसय व्यक्त गर्दै लेखेका छन्– “आवेग र आवेशमा गरिएको व्यवहारले प्रतिपक्षकै मुद्दालाई कमजोर पार्छ भन्ने कुरा बुझौँ ।”