तिलक थापा, बागलुङ ।
बागलुङका बाढीपीडितलाई युएई नेपाली एकता समाजले पठाएको राहत रकम पीडितहरुलाई हस्तान्तरण गरिएको छ । राष्ट्रिय जनमोर्चा बागलुङले बुधबार बाढीबाट विस्थापित परिवारलाई राहत रकम हस्तान्तरण गरेको हो ।
गत भदौ १७ गते देखि असोज ४ गतेसम्म विभिन्न स्थानमा गएको बाढी पहिरोबाट प्रभावित नागरिकको क्षतिको अवस्था हेरी ३ हजार देखि ५ हजार रुपैयाँसम्म नगद सहयोग गरिएको जिल्ला उपाध्यक्ष धर्म बहादुर कुँवरले बताउनु भएको छ ।
राहत वितरणका सन्दर्भमा विस्थापित परिवारको गुनासो सुनेपछि राजमो जिल्ला अध्यक्ष अमर थापाले राहत वितरण र विस्थापित परिवारको उचित व्यवस्थापनमा ढिलाइ भएको प्रति दुःख प्रकट गर्दै तत्काल पीडितहरुको माग बमोजिम काम गर्न सम्बन्धित निकायलाई दबाब दिने बताउनु भयो ।
राहत हस्तान्तरण कार्यक्रममा अध्यक्ष अमर थापा, राष्ट्रिय परिषद् सदस्य तिलक थापा, जिल्ला उपाध्यक्ष धर्म बहादुर कुँवर, जिल्ला सचिव भिमलाल पोखरेल जिल्ला सदस्य धन बहादुर अदै, अखिल नेपाल युवक संघका कोषाध्यक्ष भिमसेन वन, अखिल नेपाल शिक्षक संघका जिल्ला अध्यक्ष मित्रदत्त ढकाललगायत नेताहरुको सहभागिता थियो ।
गत भदौ १७ गते राति ढोरपाटन नगरपालिकाको भुजिखोलामा आएको बाढीबाट सो क्षेत्रमा ठुलो जनधनको क्षति भएको थियो । बाढीमा परी ३८ जना बेपत्ता भएकोमा अझै कयौंको शव फेला परेको छैन ।
त्यसयता पनि बागलुङका विभिन्न ठाउँमा पहिरोबाट धेरैले ज्यान गुमाएका छन् भने कयौं परिवार विस्थापित भएका छन् । विस्थापित परिवारलाई राष्ट्रिय जनमोर्चा, विभिन्न देशमा रहेका बागलुङबासीलगायत संघसंस्थाहरुले राहत वितरण गरिरहेका छन् ।
यो पनिः एकता समाज, जापानले पठाएको राहत भुजिखोला बाढीपीडितलाई हस्तान्तरण
