काठमाडौं । युगदर्शन डटकम पहिलो वर्ष पुरा गरी आजबाट दोस्रो वर्षमा प्रवेश गरेको छ । गत वर्ष आजकै दिन २०७६ असोज ७ गतेदेखि युगदर्शनले प्रकाशन सुरु गरेको थियो ।

युगज्योति प्रकाशन प्रालिद्वारा एक वर्ष अघिदेखि युगदर्शन साप्ताहिक सँगै अनलाइनको पनि प्रकाशन सुरु गरिएको हो । २०५६।०६६ मा काठमाडौं जिल्ला प्रशासन कार्यालयमा दर्ता भएको युगदर्शनले त्रैमासिक बुलेटिन प्रकाशन गर्दै आएको थियो ।

पछिल्लो समय अनलाइन प्रकाशनको बाढी नै आएको छ । अनलाइनले छिटो छरितो समाचार दिनुका साथै संसारभर बसेर हेर्न/पढ्न पनि सहज हुने भएकोले अनलाइनप्रति आकर्षण बढ्दै गएको छ । केही महिनादेखि जारी लकडाउन र निषेधाज्ञाले प्रिन्ट मिडिया प्रकाशनमा पुर्याएको अवरोधले पनि अनलाइन मिडियाको खोजि थप बढाएको छ । यद्यपी कैयौं अनलाइनमा प्रकाशित सामग्री विश्वसनीय नहुने र पक्षपातपूर्ण हुने गरेको गुनासा बढीरहेका छन् ।

युगदर्शनले एक वर्षको अवधिमा पाठकहरुको विश्वास जित्न सफल भएको छ । सही, सत्य र सन्तुलित समाचारसँगै युगदर्शनले गरीखाने वर्गको पक्षमा स्पष्ट वैचारिक सन्देश प्रवाह गर्न सफल भएको छ । पाठकहरुले गरेको विश्वास र सन्तुलित आलोचना हाम्रो पूँजी हो ।

युगदर्शनमा देशविदेशका दर्जनौं साथीहरु सम्वाददाताको रुपमा कार्यरत हुनुहुन्छ । हाम्रो न्युज पोर्टललाई पठनीय एवं विश्वसनीय बनाउन उहाँहरुको महत्वपूर्ण योगदान रहन्छ । यस्तै, डेस्कमा कार्यरत साथीहरु र व्यवस्थापन पक्षको अथक मेहनतले युगदर्शनलाई अझ स्तरीय बनाउँदै लैजाने हाम्रो विश्वास छ । त्यसका साथै अभिभावकको रुपमा रहेको युगज्योति प्रालि र प्रालिसँग सम्बन्धित सबै पक्षले दिने मार्गनिर्देशनले हामी थप अघि बढ्नेछौं ।

अन्तमा, एक वर्षको अवधिमै युगदर्शन खोजिने र पढिने विश्वनीय अनलाइन मध्ये एक बन्न सफल भएको छ । यो श्रद्धेय पाठकवर्गकै देन हो । यसलाई अझ अघि बढाउन यहाँहरु सबैबाट महत्वपूर्ण सल्लाह, सुझाव एवं रचनात्मक आलोचनाको अपेक्षा गर्दछौं । दोस्रो वर्ष प्रवेशको अवसरमा हामी सम्पूर्ण पाठक, विज्ञापनदाता, सुशचिन्तक सबैमा हार्दिक शुभकामना व्यक्त गर्दछौं ।