दाङ । दाङको घोराही–मुर्कुट्टी सडकमा यात्रा गर्ने नागरिकहरु दैनिक जसो सास्ती बेहोरीरहेका छ्न्। जिल्लाको सदरमुकाम घोराहीसँग जोडिएको तर जिल्लाकै दुर्गम र पहाडी पालिका बङगलाचुली गाउँपालिका जाने सडक अहिले हिलाम्य छ ।
गर्मी र हिउँदको सिजनमा धुलोमा नदेखिने यात्रुहरु अहिले हिलोले पुरिने अबस्थामा छन् । दैनिक सञ्चालन हुने मोटरसाइकलको मडगाडमा हिलो छिरेर टायर नघुम्दा दुर्घटना हुने, इन्जन सिज हुने अवस्था छ भने टिपरमा पनि त्यही अबस्था भएर ठूलो क्षति हुने गरेको छ ।
बाटोमा गाडी नै डुब्ने गरि हिलो छ । सडक निर्माणको नाममा वर्खामा माटो खनेर बाटोमा राख्ने र त्यही माटो गाडीले यता उता सार्ने, पानीको भललाई बाटो तर्काउनुको साटो बाटोमा कतै भएका पानीका मुलहरु पनि बाटो तिरै लगाइदिने जस्ता कारण समस्या उत्पन्न भएको छ ।
सडक निर्माण कम्पनी र सम्बन्धित निकायको गैर जिम्मेवारीका कारण यात्रुले सास्ति खेप्नुपरिरहेको स्थानीय बताउँछन् ।
बङगलाचुली गाउँपालिका चुनढुङ्गाको खानी हो ।
त्यहाँबाट अनियन्त्रित रुपमा सरकारी मापदण्ड र सहमती बिपरित उत्खनन् गर्ने काम भइराखेको छ । त्यहाँ काम गर्ने मजदुरहरुले उचित सुबिधा नपाएको गुनासो गर्छन् । सिमेन्ट उधोग र स्थानीयबीच भएका कुनै पनि सम्झौता पूरा भएका छैनन् ।
प्राकृतिक स्रोतका हिसाबले जिल्लाकै धनि पालिका रहेर पनि नागरिकको जीवन शैली जिल्लाकै गरिब जस्तो देखिने राष्ट्रिय जनमोर्चाका जिल्ला अध्यक्ष गणेश आचार्य बताउनुहुन्छ । सत्तामा बस्नेहरुले त्यहाँका जनतालाई सधैँ वेवास्ता गर्ने गरेको उहाँको भनाई छ ।
