काठमाडौं । वायु सेवा कम्पनीहरुले सिट ५० प्रतिशत मात्रै यात्रु राखेर उडान गर्न सरकारले दिएको निर्देशन अस्वीकार गरेका छन् । निजी क्षेत्रको वायुसेवा छाता संगठन ‘वायुसेवा सञ्चालक संघ नेपाल’ (एओएएन)ले ५० प्रतिशत यात्रु बोकेर उडान गर्न दिने सरकारको निर्णय व्यवहारिक नभएको बताएका हुन् ।
एओएएनले यात्रुबाट बढी भाडा लिने सरकारको निर्णयको पनि विरोध गरेको छ । सञ्चालकहरुले सुरक्षाका उपाय अपनाएर सिट क्षमता अनुसार यात्रु राख्ने र भाडा नबढाउने अडान लिएका छन् ।
एओएएनका अध्यक्ष क्याप्टेन रामेश्वर थापाले एयरक्राफ्टमा पूर्ण क्षमतामा यात्रु राखि पुरानै भाडादरमा सञ्चालन गर्न दिएमात्रै आफुहरुले उडान सूचारु गर्न सक्ने बताउनुभयो । बिहीबार न्यूज एजेन्सी नेपालसँग कुराकानी गर्दै अध्यक्ष थापाले संकटको बेला यात्रुबाट ५० प्रतिशत थप भाडा लिनु न्यायोचित नभएको पनि स्पस्ट पार्नुभयो ।
उहाँले ५० प्रतिशत यात्रु बोक्नै पर्ने भए सरकारले सहुलियत प्रदान गर्नुपर्ने बताउनुभयो । सरकारले कुन आधारमा यात्रुसँग ५० प्रतिशत बढी भाडा लिन र एयरक्राफ्ट भित्र ५० प्रतिशत यात्रु राख्न भन्यो आफुहरुले बुझ्न नसकेको थापाको भनाई छ ।
एयरलाइन्स घाटामा गएपनि भाडादर नबढाइकन उडान गर्न आफुहरु सक्षम रहेको पनि थापाले स्पस्ट पार्नुभयो
अन्तर्राष्ट्रिय उडान भर्ने जहाजले पूर्ण क्षमतामा यात्रु बोक्न पाउने तर देश भित्रै कम समयका लागि उडान गर्ने एयरक्राफ्टले पूर्ण क्षमतामा यात्रु बोक्न नपाउने सरकारको निर्णय भ्रामक भएको पनि उहाँको भनाई छ ।
६० प्रतिशत यात्रु बोकेपछि मात्रै एयरलाइन्सको लागत उठने र ७५ प्रतिशत सम्म यात्रु बोक्न पाए केही नाफा हुन सक्ने भएकाले सरकारले पूर्ण क्षमतामा एयरलाइन्स सञ्चालन गर्न दिनुपर्ने थापाले बताउनुभयो ।
