काठमाडौँ । भारतीय संसदमा एक सांसदले नेपाली भाषामा सम्बोधन गर्दै तेन्जिङ नोर्गे शेर्पालाई ‘भारत रत्न’ बाट सम्मानित गर्न आग्रह गरेका छन् ।
पश्चिम बङ्गाल राज्यस्थित दार्जिलिङका सांसद राजु विष्टले आफूले आफ्नो मातृभाषामा सम्बोधन गर्ने भन्दै विश्वकै सर्वोच्च शिखर सगरमाथामा आरोहण गर्ने विश्वकै पहिलो व्यक्ति नेपालका तेन्जिङ नोर्गे शेर्पाको चर्चा गरेका थिए।
मङ्गलबारको लोकसभा बैठकमा विष्टले तेन्जिङ नोर्गे शेर्पालाई ‘भारत रत्न’ बाट सम्मानित गर्नुपर्ने भारत सरकारसँग माग राखेका थिए । सगरमाथा आरोहणका समयमा नेपाली नागरिक रहेका तेन्जिङले पछि भने भारतीय नागरिकता लिएका थिए ।
नेपालको सोलुखुम्बु जिल्लामा सन् १९१४ मा जन्मिएका शेर्पाको निधन दार्जिलिङमा सन् १९८६ मा भएको थियो । सांसद विष्टले सर्वोच्च शिखर सगरमाथाको आरोहण गर्ने शेर्पा विश्वकै आइकन भएको बताएका थिए।
संसदलाई सम्बोधन गरेपछि सांसद विष्टले सामाजिक सञ्जालमा लेखेका छन्ः
“मैले आज संसदमा, भारत सरकारसँग पहाडका सिंह स्वर्गीय तेन्जिङ नोर्गे शेर्पाज्यूलाई देशको सर्वोच्च नागरिक सम्मान ‘भारतरत्न’ प्रदान गर्न अनुरोध गरेँ ।
२९ मई १९५३ मा एउटा नयाँ विश्व इतिहास रचिएको थियो, जब तेन्जिङ नोर्गे शेर्पा र एडमन्ड हिलेरी सगरमाथाको शिखरमा पहिलोपल्ट चढ्नमा सफल हुनुभएको थियो। यस अभूतपूर्व सफलता हासिल गरेर उहाँहरूले इतिहास त बनाउनुभयो नै, साथै आफ्नो लगनशीलता, प्रशिक्षण र सङ्कल्पको उदाहरण प्रस्तुत गर्नुभएको थियो। उहाँहरूको यो अभूतपूर्व सफलताको विश्वले आजसम्म गुणगान गर्दछ।
मैले संसदलाई असाधारण परिस्थितिहरूका बाबजसद तेन्जिङ नोर्गे शेर्पाले कसरी सगरमाथाको शिखरमा पुगेर समग्र विश्वसामु एक आइकन बन्न पुग्नुभयो भन्ने सम्झना गराएँ।
यस असाधारण उपलब्धिलाई मान्यता दिँदै तेन्जिङ नोर्गो शेर्पालाई सन् १९५३ मा नै जोर्ज मेडल, स्पेसल ओलम्पिक मेडल, इरान शाह मेडल, नेपालतारा, युएसएसआर स्पेसल मेडल, फ्रेन्च स्पोर्टस् स्पेसल मेडलका साथै अन्य कैयौँ प्रतिष्ठित मेडलहरूले सम्मानित गरिएको थियो।
उहाँलाई १९९९ मा टाइम्स म्यागेजिनद्वारा विश्वका सबैभन्दा प्रभावशाली व्यक्तिहरूमध्ये एक घोषित गरिएको थियो। सन् २००० मा उहाँलाई लाइफ म्यागेजिनद्वारा विश्वका १० सर्वश्रेष्ठ एथलिटमध्ये एकजनाको रूपमा मान्यता प्रदान गरिएको थियो।
नासाले प्लुटो ग्रहका पहाडमध्ये एउटाको नामकरण तेन्जिङ माउन्टेन राखेर उहाँको साहसिक कार्यको सम्मान गरेको छ।
हाम्रो राष्ट्रले उहाँलाई प्रतिष्ठित सम्मान पद्म भूषणले सम्मानित गरेको छ, साथै उहाँको नाममा हाइएस्ट एडभेन्चर्स स्पोर्टस् अवार्ड स्थापना गरिएको छ। तर पनि उहाँको ऐतिहासिक उपलब्धिका निम्ति दिइनुपर्ने सम्मान अझ पनि अपुरो नै छजस्तो मलाई लाग्छ।
भारतवर्षले कुनै व्यक्तिलाई प्रदान गर्ने सर्वोच्च नागरिक सम्मान ‘भारतरत्न’ का लागि तेन्जिङ नोर्गे शेर्पा सर्वाधिक योग्य भएता पनि आजसम्म उहाँलाई यो सम्मान प्रदान गरिएको छैन।
उहाँले आफ्नो जीवन बिताउनुभएको दार्जीलिङ्ग पहाड, तराई, र डुवर्सका जनता, साथै हाम्रो राष्ट्र एवम् सारा विश्वका साहसिक खेलप्रेमी जनताको पक्षमा, मैले हाम्रो सरकारसँग, स्वर्गीय तेन्जिङ नोर्गे शेर्पाज्यूलाई ‘भारतरत्न’ सम्मान प्रदान गरेर उहाँको मानव क्षमताभन्दा माथिको उपलब्धिलाई मान्यता दिने विनम्र अनुरोध गरेको छु।”
