काठमाडौं । प्रदेश नम्बर १ का मुख्यमन्त्री शेरधन राईको श्रीमती दाबी गर्ने बालिका खड्काले मुद्दा फिर्ता लिएकी छन् । मुख्यमन्त्री राईसँग अंश माग गर्दै हालेको मुद्दा खड्काले बुधबार फिर्ता लिएकी हुन् ।
खड्काले काठमाडौं जिल्ला अदालतमा मुद्दा फिर्ताका लागि निवेदन दिँदै आफूले अरुको उक्साहटमा परेर मुख्यमन्त्री राईलाई त्यस्तो आरोप लगाएको बताएकी छन् ।
दोलखाकी ३२ वर्षीया खड्काले मुद्दा फिर्ता लिँदै भनेकी छिन्, ‘निज शेरधन राईसँग अंश माग गर्नका लागि श्रीमान श्रीमतीका लागि नाता कायम भएको वा हुनसक्ने मसँग कुनै आधार प्रमाण नभएको र वास्तविक रुपमा हाम्रो त्यस्तो कुनै पनि सम्बन्ध नरहेको हुँदा यसरी नाता कायमै हुन सक्दैन ।’
युवतीको निवेदन र मुद्दा फिर्ताको कागज गरी बुझाएपछि जिल्ला अदालत काठमाडौंले राई विरुद्ध लागेको अंश मुद्दा खारेज गरी लगत कट्टा गरेको छ । अदालतसमक्ष गरेको कागजमा भनेकी छिन्, ‘म आफू अरुको दुरुत्साहनमा परी शेरधन राईकी श्रीमती भनी दाबी गरी अंश माग गरिएको हो ।’
