धनगढी । राष्ट्रिय जनमोर्चाले धनगढीस्थित दिनेश सञ्चारगृहमा केही व्यक्ति प्रवेश गरी पत्रकारमाथि कुटपिट गरेको घटनाप्रति भर्त्सना गरेको छ ।
राजमो केन्द्रीय सदस्य एवं सुदूरपश्चिम प्रदेश इन्चार्ज मनोज भट्टले शुक्रबार विज्ञप्ति प्रकाशित गरी घटना विरोध गर्नुभएको हो । नेता घटनाको भर्त्सना गर्दै दोषिलाई कानूनी दायरामा ल्याउन माग गर्नुभएको छ ।
नेपाल पत्रकार महासंघ कैलाली शाखाका अनुसार धनगढी थुनुवा कक्षभित्रै एक युवकले आत्महत्या गरेको विषयमा प्रकाशित समाचारलाई लिएर आज १५/२० जनाको समूहले एक्कासि सञ्चारगृहभित्र प्रवेश गरी आक्रमण गर्दै उक्त समाचार डिलिट गर्न धम्क्याउँदै एफएमका सह–सम्पादक जनक विष्टलगायतका पत्रकारमाथि हातपात र कुटपिट गरेको थियो ।
शुक्रबार धनगढीमा थुनुवा कक्षभित्रै १९ वर्षीय युवकले गरे आत्महत्या भन्ने समाचार झुटो भएको र डिलिट गर्नुपर्ने भन्दै दिनेश सञ्चार गृहमा कार्यरत पत्रकारमाथि कुटपिट गरेका हुन् । उनीहरुले सञ्चार गृहका सह–सम्पादक जनक विष्ट लगायतका पत्रकारमाथि कुटपिट गरेका थिए ।
सो घटनाप्रति नेपाल पत्रकार महासंघले समेत विरोध गरेको छ । महासंघले निकालेको विज्ञप्तिमा घटनामा संलग्न व्यक्तिको तत्काल पहिचान गरी कानूनी दायरामा ल्याउन एवं पत्रकार र सञ्चारगृहको सुरक्षामा गम्भीर भई स्वतन्त्र र निर्वाहरुपमा काम गर्ने वातावरण निर्माण गर्नसमेत महासङ्घले सम्बन्धित निकायको ध्यानाकर्षण गराएको छ ।
