काठमाडौं । सत्तारुढ दल नेपाल कम्युनिष्ट पार्टी (नेकपा) को स्थायी कमिटी बैठकले अमेरिकी सहयोग परियोजना एमसीसी पास गर्ने निर्णय गरेको छ । विवादका कारण लामो समयदेखि संसदमा विचाराधीन एमसीसी सत्तारुढ दलको शुक्रबार बसेको स्थायी कमिटीले पास गर्ने निर्णय गरेको हो ।
एमसीसीलाई आवश्यकता अनुसार संशोधन र परिमार्जन गरी अनुमोदन गर्ने निर्णय पनि नेकपाले गरेको छ । झलनाथ खनाल नेतृत्वको कार्यदलले दिएको सुझावका आधारमा संशोधनको प्रकृया छिट्टै अगाडि बढाइने प्रवक्ता नाराणकाजी श्रेष्ठले बताउनुभयो ।
सो निर्णयप्रति नेता लिलामणी पोखरेलले भने असहमति दर्ज गर्नुभएको छ । एमसीसी नेपालको हितमा नभएकोले त्यसलाई अनुमोदन गर्नै नहुने पोखरेलको अडान छ ।
एमसीसीसँगै दर्जन बढी सहायक सम्झौता पनि भएको र तिनलाई गोप्य राखिएकोले यसलाई अनुमोदन गर्नु घातक हुने पोखरेलले बनाउनुभयो ।
‘एमसीसी स्वयं नेपालको राष्ट्रिय हितअनुकूल छैन,’ पोखरेलले सञ्चारकर्मीसंग भननुभयो, ‘त्यसमा पनि अमेरिकीहरुले एमसीसीको मूल सम्झौता संशोधन हुँदैन भनेर भनिसकेका छन् भने हामीले त्यसलाई कसरी परिमार्जन र संशोधन गर्न सक्छौं ?’
एमसीसी इन्डो प्यासिफिक स्ट्राट्रेजी (आईपीएस) को अंग भएकाले नेपालले अमेरिकी डिफेन्स पोलिसीलाई किन सहयोग गर्ने ? भन्ने उहाँको प्रश्न छ ।
