काठमाडौं । सांसदहरुले संसदीय सुनुवाईका क्रममा राजदूतहरुलाई राजदूतको पद आराम गर्ने थलोका रुपमा नलिन सुझाव दिएका छन् । संघीय संसद संसदीय सुनुवाई समितिले प्रस्तावित राजदूतहरु राजकाजी खड्का, गोहेन्द्र राजभण्डारी र तापस अधिकारीको नाम सर्वसम्मतिले अनुमोदन गरेको छ ।
संसदीय सुनुवाईका क्रममा प्रस्तावित राजदूतहरुमाथि विभिन्न प्रश्न राख्दै सांसदहरुले राजदूत भएपछि गर्ने कामबारे प्रतिवद्धता मागेका थिए । सरकारले खडकालाई जर्मनी, राजभण्डारीलाई बेल्जियम सहित युरोपियन युनियन र अधिकारीलाई पाकिस्तानको राजदूतका लागि सिफारिस गरेको थियो ।
विशेष सुनुवाईमा सांसदहरुले तीन वटै राजदूतमाथि परेका उजुरी र अन्य समसामयीक विषयमा पालैपालो प्रश्न गरेका छन् । त्यस क्रममा सांसद भिमसेना दास प्रधानले राजदूत पदलाई आराम गर्ने थलोका रुपमा नबुझ्न सुझाव दिनुभएको हो ।
सांसदहरु सुरेन्द्र पाण्डे, शिवकुमार मण्डल, ज्ञानेन्द्रबहादुर कार्की, पुष्पा भुसाल, जितेन्द्रनारायण देव, निरुदेवी पाल, देव गुरुङ, लक्ष्मणलाल कर्णलगायतले प्रस्तावित राजदूतले गर्ने कामबारे प्रश्न राखेका थिए । जसको जवाफ प्रस्तावित राजदूतहरुले दिएपछि समितिले उनीहरुको नाम सर्वसम्मतबाट अनुमोदन गरेको हो ।
