काठमाडौँ । नेपालमा कोरोना भाइरस सङ्क्रमितको सङ्ख्या ५० हजार नाघेको छ । आज थप १ हजार २ सय ४६ जनामा सङ्क्रमण पुष्टि भएसँगै कुल सङ्क्रमितको सङ्ख्या ५० हजार ४ सय ६५ पुगेको हो । आज ११ हजार १ सय ४४ वटा पिसिआर परीक्षण भएको छ । काठमाडौँमा मात्रै आज ४ सय ९५, ललितपुरमा ४३ र भक्तपुरमा ३४ जनामा सङ्क्रमण देखिएको छ ।
कोरोना भाइरस (कोभिड—१९) बाट नेपालमा थप ५ जनाको मृत्यु भएको छ । स्वास्थ्य तथा जनसङ्ख्या मन्त्रालयका अनुसार १ महिला र ४ पुरुषको कोरोनाबाट मृत्यु भएको हो । काठमाडौँमा मात्रै एक महिलासहित ३ जनाको मृत्यु भएको मन्त्रालयका प्रवक्ता डा. जागेश्वर गौतमले बताउनुभयो । काठमाडौँमा ५५ वर्षीया महिला, ५९ र ८३ वर्षीय पुरुषको कोरोनाबाट मृत्यु भएको हो । यस्तै, चितवनमा ६२ वर्षीय पुरुष र कपिलवस्तुमा २९ वर्षीय पुरुषको मृत्यु भएको छ । यो सँगै नेपालमा कोरोनाबाट मृत्यु हुनेको सङ्ख्या ३ सय १७ पुगेको छ ।
आज देशभरि सक्रिय सङ्क्रमितको सङ्ख्या १४ हजार ४ सय ४८ जना रहेको छ । प्रदेश नम्बर १ मा ४ सय ७२, प्रदेश नम्बर २ मा ४ सय २५, बागमती प्रदेशमा ४ हजार ५ सय ३९ र गण्डकी प्रदेशमा ७ सय ५३ जना रहेका छन । यस्तै, प्रदेश नम्बर ५ मा १ हजार ४५, कर्णाली प्रदेशमा २ सय ७२ र सुदूरपश्चिम प्रदेशमा ५ सय ४ गरी देशभरि संस्थागत आइसोलेसनमा ८ हजार १० जना रहेका छन ।
यस्तै, होम आइसालेसनमा प्रदेश नम्बर १ मा ८ सय ७४, प्रदेश नम्बर २ मा २ हजार १ सय ४५, बागमती प्रदेशमा २ हजार ४ सय ५७ र गण्डकी प्रदेशमा १ सय जना रहेका छन । यस्तै, प्रदेश नम्बर ५ मा ६ सय ३, कर्णाली प्रदेशमा ९० र सुदूरपश्चिम प्रदेशमा १ सय ६९ गरी देशभरि ६ हजार ४ सय ३८ जना सङ्क्रमित होम आइसोलेसनमा रहेका छन । आज आइसियुमा १ सय ६५ जना भेन्टिलेटरमा २१ जना सङ्क्रमित उपचाररत रहेका छन ।
आज १ हजार ८ सय १८ जा सङ्क्रमित निको भएर घर फर्किएका छन । प्रदेश नम्बर १ मा ३ हजार २ सय १८, प्रदेश नम्बर २ मा १० हजार १ सय ५२, बागमती प्रदेशमा ६ हजार ७ र गण्डकी प्रदेशमा २ हजार ७७ जना डिस्चार्ज भएका छन । यस्तै प्रदेश नम्बर ५ मा ६ हजार १ सय ३३, कर्णाली प्रदेशमा २ हजार ४ सय २४ र सुदूरपश्चिम प्रदेशमा ५ हजार ६ सय ८९ जना गरी आजसम्म ३५ हजार ७ सय जना सङ्क्रमित निको भएर घर फर्किएका छन ।
मन्त्रालयले विदेशबाट आउने, एक जिल्लाबाट अर्को जिल्लामा आवत्जावत् गर्दा आफ्नै घर र खर्चमा १४ दिन अनिवार्य क्वारेन्टिनमा बस्नुपर्ने नियम बनाएको छ । १४ दिनमा कुनै लक्षण नदेखिएमा परीक्षणको आवश्यकता नपर्ने उहाँले बताउनुभयो । यस्तै, विदेशबाट आउँदा ७१ घण्टाअघि पिसिआर परीक्षण गरेको रिपोर्टलाई आधार मान्ने निर्णय पनि मन्त्रालयले गरेको छ । मन्त्रालयले पिसिआर रिपोर्ट नभर्इ आपत्कालीन शल्यक्रिया नगर्ने स्वास्थ्य संस्था र चिकित्सकलाई कानुनअनुसार कारबाही गर्ने चेतावनी पनि दिएको छ ।
