काठमाडौं । विवादित अमेरिकी परियोजना मिलेनियम च्यालेन्ज कम्प्याक्ट (एमसीसी) परिमार्जन पछि मात्रै लागू गर्न प्रधानमन्त्री केपी शर्मा ओली तयार हुनुभएको छ ।
सत्तारुढ नेकपा भित्रै लामो समयदेखि विवादित एमसीसी परिमार्जन गर्न ओली राजी भएको नेकपाका एक नेताले बताएका छन् । बुधबार प्रधानमन्त्री एवं पार्टी अध्यक्ष ओली र अर्का अध्यक्ष प्रचण्डबीच शक्ति बाँडफाँडका क्रममा भएको सहमतिमध्ये एउटा एमसीसी पनि हो ।
नेकपाका ती नेताका अनुसार एमसीसीलाई स्थायी समिति र सचिवालय बैठकमा पेस गरेर अमेरिकासँगको सहमतिमा संशोधन गरेर मात्र अनुमोदन गर्न दुवै अध्यक्ष सहमत भएका छन् ।
यद्यपी नेकपा भित्र र बाहिर एमसीसी खारेज नै गर्नुपर्ने आवाज चर्कोसँग उठिरहेको छ भने अमेरिकी संस्थापन पक्षले जस्ताको तस्तै पारित गर्न दबाब दिँदै आएको छ । नेपालस्थित अमेरिकी दूतावासका एक उच्च अधिकारीले एमसीसी परिमार्जन हुन नसक्ने स्पष्ट पारिसकेका छन् ।
विवाद समाधान गर्न दुवै अध्यक्ष सहमत
सत्तारुढ दल नेकपाको लामो समयदेखि जारी विवाद अन्त्य गर्न अध्यक्षद्वय केपी शर्मा ओली र पुष्पकमल दाहाल प्रचण्ड सहमत भएका छन् । दुई अध्यक्षबीच भएको विवाद समाधानका बुँदा समावेश गरी शुुक्रबार बस्ने बैठकमा पेस गरिने बताइएको छ ।
प्रधानमन्त्री ओली सरकारका काममा मात्र केन्द्रित हुने र प्रचण्डले पार्टी सञ्चालन गर्नेगरी बुधबार सहमति जुटेको हो । पार्टीलाई विधि र प्रक्रियाको आधारमा सञ्चालन गर्न, मन्त्रिमण्डल पुनर्गठन गर्न, केन्द्रीय सदस्यको जिम्मेवारी पुनरावलोकन गर्न र कात्तिकदेखि महाधिवेशनको तयारी थाल्न ओली र प्रचण्ड सहमत भएका छन् ।
तत्कालीन एमाले र माओवादी केन्द्रबीच २०७५ जेठ ३ गते एकता भएको थियो । त्यसयता तीन नेताहरु ओली, प्रचण्ड र माधव नेपालको गुटबीच तीब्र अन्तरविरोध देखिन्छ । नेकपामा यी तीन नेता मध्ये दुई जना जता मिल्छन् त्यहीँ बहुमत पुग्ने र एक्लिएका नेता भड्कने क्रम चलिरहेको छ ।
