काठमाडौं । साउदी अरबमा रहेका नेपालीले प्रधानमन्त्री केपी शर्मा ओलीविरुद्ध चर्को नाराबाजी गरेका छन् । नेपाल आउने पर्खाइमा साउदी अरेबियाको रियादस्थित सेमास्को कम्पनीको आवास गृह परिसरमा रहेका नेपालीले त्यहीँबाट प्रधानमन्त्री ओलीविरुद्ध ‘देश छोड्’ को नारा लगाएका हुन् ।
कम्पनीबाट काम गुमाएर नेपाल फर्किन विमान कुरिरहेका ती श्रमिक स्वदेश फर्किन नपाएपछि आफ्नै सरकारविरुद्ध आक्रोशित बनेका हुन् । प्रदर्शनकारी नेपालीहरुले साउदी दूतावास खारेजीको माग समेत गरेका छन् ।
महिनौंदेखि विमान कुरिरहेका उनीहरु मंगलबार (आज) नेपाल उड्ने मिति तय भएको थियो । तत्कालै आफूहरु स्वदेश जान नपाउने अवस्था देखेपछि उनीहरु थप आक्रोशित हुन पुगेका हुन् । उनीहरुले गरेको नाराबाजीको भिडियो अहिले सामाजिक सञ्जालमा भाइरल भएको छ ।
सरकारले अहिले केही गन्तव्यबाट सीमित मात्र नियमित उडान खोलेको छ । तर, कोरोना संक्रमण जाँच्न पीसीआर परीक्षण सहज नभएको भन्दै साउदीसहितका केही खाडी मुलुकमा चार्टर्ड उडान मात्रै गरिरहेको छ । तर, चार्टर्ड उडानको संख्या यति थोरै छ कि अलपत्र हजारौं नेपाली कहिले घर फर्किन पाउँछन् भन्ने टुंगो छैन ।
यतिबेला विदेशी भूमिमा लाखौं नेपाली रोजगारी गुमाएर अलपत्र परेका छन् । तर ती नेपालीलाई ल्याउन सरकारले उचित पहल गरेका छैन । सिमित मात्रामा पठाइएको चार्टड उडानले महंगो भाडा लिएर सिमित नेपालीलाई ल्याउने गर्दछ ।
तर बेखर्ची भएका वा समस्यामा परेका नेपालीहरु सरकारको प्राथमिकतामा पर्दैनन् । यसै कारणले नेपालीहरु आक्रोशित भएका ती नेपालीले जनाएका छन् ।
भिसाको म्याद सकिएका करिब ६ सय जना नेपाली स्वदेश फर्किने दिनको पर्खाइमा छन् । अन्य श्रमिकहरू सप्लाइ कम्पनीले लिएको कन्ट्र्याक्टमा काम नभएपछि लामो समयदेखि कोठामै बसिरहेका छन् । काम गरिरहेकाहरूको पनि तलब कटौति भएको उनीहरूले बताएका छन् ।
