काठमाडौं । अखिल नेपाल किसान महासंघले सरकारले हाल रोक्का रहेको कृषियोग्य जग्गाको कित्ताकाट खुला गरेकोप्रति आपत्ति प्रकट गरेको छ ।
महासंघका अध्यक्ष भैरव रेग्मीले मंगलबार एक वक्तव्य प्रकाशित गरी सरकारले भूउपयोग सम्बन्धी नीति नै नबनाई खेतीयोग्य जमिन खण्डिकरण गर्न खोजेको भन्दै विरोध गर्नुभएको छ । सरकार नै कृषि नीति विरोधी रहेको भन्दै ‘सो निर्णयले भूमाफिया तथा दलाल पूँजीपति वर्गलाई नै फाइदा पुग्ने’ वक्तव्यमा उल्लेख छ ।
भूमि व्यवस्था, सहकारी तथा गरिबी निवारण मन्त्रालयले सोमबार एक सूचना जारी गरी कृषियोग्य जग्गाको खण्डिकरण सम्बन्धी भएका पूर्व निर्णयहरु बदर गरिएको जनाएको हो । मन्त्रालयले भूउपयोग नीतिसम्बन्धी नियमावलि बनाई मन्त्रिपरिषदमा पेश गरेको छ जुन पारित हुन भने बाँकी छ ।
सो नियमावलीमा जग्गाको बर्गिकरण गरी सोअनुसार प्रयोग गर्ने प्रस्ताव तयार पारिएको छ । तर, सो पारित हुनुअघि नै मन्त्रिस्तरको निर्णयबाट मन्त्रालयले कित्ताकाट खुला गरेको छ ।
हाललाई भू–उपयोग ऐन २०७६ र प्रचलित कानुनको परिधिमा रही जग्गाको कित्ताकाटसम्बन्धी व्यवस्था खुलाउन मन्त्रिस्तरको निर्णय भएको सो मन्त्रालयद्वारा जारी सूचनामा उल्लेख छ । मन्त्रिस्तरबाट भदौ १८ मा भएको सो निर्णयबारे ‘विभागमार्फत् मातहत कार्यालयहरुमा निर्देशन दिन’ परिपत्र गरिएको छ ।
