धनवीर पुन मगर

नयाँदिल्ली । मूल प्रवाह अखिल भारत नेपाली एकता समाजका नेता दोर्णप्रसाद पोख्रेल हामीमाझ रहनुभएन । ५९ वर्षीय पोख्रेलको सोमबार पन्जाबको पटियालास्थित राजेन्द्र अस्पतालमा निधन भएको हो । अस्पतालले उहाँको निधन कोभिड–१९ का कारणले भएको रिपोर्ट दिएको छ ।

सुदूरपश्चिमोत्तर क्षेत्रीय समितिको सदस्यसमेत रहनुभएका पोख्रेलको असामयिक निधनप्रति मूल प्रवाह अखिल भारत नेपाली एकता समाजले शोकवक्तव्य जारी गर्दै उहाँप्रति श्रद्धाञ्जली तथा शोकसन्तप्त परिवारप्रति गहिरो समवेदना प्रकट गरेको छ ।

सेप्तेम्बर ७, २०२० कै दिन समाजका अध्यक्ष दुर्गाबहादुर केसीद्वारा हस्ताक्षरित उक्त शोकवक्तव्यमा भनिएको छ–

“रोजगारीको सिलसिलामा पन्जाबको लुधियाना पुग्नुभएका दोर्णप्रसाद पोख्रेलको सोमबार ७ सितम्बर २०२० का दिन बिहान ७ बजे दुःखद निधन भएको समाचारले हामीलाई स्तब्ध बनाएको छ । ५९ वर्षका पोखरेलले मूल प्रवाह अखिल भारत नेपाली एकता समाजको टोल समिति हुँदै हाल सुदूरपश्चिमोत्तर क्षेत्रीय समितिको सदस्य तथा सन २०१४ मा लखनऊमा सम्पन्न सातौँ अखिल भारत सम्मेलनबाट केन्द्रीय परिषद् सदस्यमा चयन हुनुभएको थियो ।

श्री दोर्णप्रसाद पोखरेल सन १९९० देखि एकता समाजमा सङ्गठित भई हालसम्म प्रवासी नेपालीहरूको हकहितमा निरन्तर खटिरहनुभएको थियो । एकता समाजको टोल समितिदेखि हालसम्म जुन जुन स्थानमा रहेर सङ्गठनको जिम्मेवारी पाउनुभयो, उहाँले निर्विवाद, स्वच्छ र जिम्मेवारीपूर्वक काम गर्दै आउनुभएको थियो । तर दुःखसाथ भन्नुपर्दा आज हामीले एउटा क्रान्तिकारी, इमान्दार र जुझारु कार्यकर्ता गुमाएका छौँ । उहाँको निधनले सिङ्गो मूल प्रवाह अखिल भारत नेपाली एकता समाजलाई अपूरणीय क्षति पुगेको छ ।

उहाँले हामीलाई इमान्दारिता, मृदु स्वभाव, संयमित र मितव्ययी व्यवहार आम कार्यकर्ताले अवलम्बन गर्नैपर्ने शिक्षा दिएर जानुभएको छ । उहाँले दिएको एउटा पनि राम्रो बानी हामी आम कार्यकर्ताहरूले अवलम्बन गर्न सक्यौँ भने मात्रै उहाँप्रतिको सच्चा श्रद्धाञ्जली हुने छ । साथै आम कार्यकर्ताहरूले शोकलाई शक्तिमा परिणत गरी उहाँले देखाएको बाटोमा अग्रसर रहन अनुरोध गर्दछौँ ।

हामी उहाँप्रति भावपूर्ण श्रद्धाञ्जलीका साथै शोकसन्तप्त परिवारजनमा पर्न गएको दुःखप्रति गहिरो समवेदना प्रकट प्रकट गर्दछौँ ।”