काठमाडौं । धनुषामा खोलाको बाढीले बगाएर ल्याएको काठको स्वामित्वलाई लिएर झडप हुँदा पाँच जना घाइते भएका छन् । धनुषाको बटेश्वर गाउँपालिका–५ शान्तिपुरमा भएको झडपका क्रममा प्रहरी इन्सपेक्टरसहित ५ जना घाइते भएका हुन् ।
धनुषाको बटेश्वर गाउँपालिका र क्षिरेश्वरनाथ नगरपालिकाको सीमा भएर बग्ने औरही खोलामा फेला परेको सखुवाको गोलिया कसले लैजाने विषयमा आइतबार राति झडप भएको इलाका प्रहरी कार्यालय सखुवाले जनाएको छ ।
खोलामा स्थानीय मुसहर समुदायले तीनफिट मोटो सखुवाको गोलिया फेला पारेका थिए । सो गालिया आफूहरुले लैजान पाउनुपर्ने गाउँलेको अडान र गाउँलेलाई नदिने प्रहरीका भनाईका कारण विवाद उत्पन्न भएको थियो । प्रहरीले ट्रयाक्टरमा गोलिया लोड गरी लग्न खोजेपछि स्थानीयले अवरोध गर्दै प्रहरीमाथि ढुंगामुढा गरेका थिए । त्यसपछि प्रहरीले पनि लाठीचार्ज गरेको स्थानीयले बताएका छन् ।
गाउँलेको ढुंगामुढाबाट प्रहरी निरीक्षक दीपक राय र प्रहरी जवान रामविश्वास परित घाइते भएका छन् । प्रहरीको लाठीबाट एक महिलासहित ३ जना घाइते भएका छन् ।
घाइतेहरुको जानकी मेडिकल कलेजमा उपचार भइरहेको छ । काठको गोलिया भने प्रहरीले बरामद गरेर राखेको छ ।
