काठमाडौं । राष्ट्रिय जनमोर्चाले हालै बागलुङको ढोरपाटनमा आएको बाढी र यसअघि सिन्धुपाल्चोकमा गएको पहिरोले ठुलो मानवीय क्षति हुनुमा सरकारको कमजोरी औंल्याएको छ ।

ती दुवै ठाउँमा ठुलो जनधनको क्षति हुनु प्रकट रूपमा प्राकृतिक विपत्ति भएपनि त्यसका पछाडि मानवीय कमजोरी वा सरकारको कमजोरी रहेको राजमोले ठहर गरेको छ ।

शनिबार विज्ञप्ति प्रकाशित गरी राजमो उपाध्यक्ष एवं प्रवक्ता दुर्गा पौडेलले ‘सरकारले समयमा ध्यान दिएको भए त्यो विपत्ति र त्यहाँ भएको क्षतिलाई रोक्न सकिने उल्लेख गर्नुभएको छ । उहाँले बागलुङ र सिन्धुपाल्चोकका जस्तै जोखिमयुक्त बस्ती अन्य ठाउँमा पनि हुन सक्ने भन्दै समयमै अध्ययन गर्न र उपयुक्त ठाउँमा सार्न माग गर्नुभएको छ ।

यस्तो छ वक्तव्य
बाग्लुङको ढोरपाटनमा बाढीपहिरोको कारणले जनधनको ठुलो क्षति भएकोप्रति हाम्रो पार्टी स्तब्ध भएको छ । त्यसबारे हाम्रो पार्टीका अध्यक्ष का. चित्रबहादुर केसीको वक्तव्य गइसकेको छ । बाढीपहिरो पीडित जनतालाई उद्धार र सहयोगको लागि हामीहरूले सबैसित अपिल गर्दछौँ ।

बाग्लुङको बाढीपहिरोसँग सम्बन्धित एउटा अर्को गम्भीर विषयप्रति जनता, सरकार, सबै राजनीतिक पार्टी र सङ्घसंस्थाहरू समेतको ध्यान आकर्षित गर्न यो वक्तव्य जारी गरिएको छ । बाढीपहिरोको प्रकृतिबाट यो कुराको स्पष्ट भएको छ कि प्रकट रूपमा त्यो घटना प्राकृतिक विपत्ति भएको भए पनि त्यसका पछाडि मानवीय कमजोरी वा सरकारको कमजोरी नै मुख्य रूपमा जिम्मवार छ । सरकारले समयमा ध्यान दिएको भए त्यो विपत्ति र त्यहाँ भएको क्षतिलाई रोक्न सकिन्थ्यो तर त्यहाँको अवस्थाबारे सरकारले आवश्यक ध्यान दिन नसक्दा ठुलो विपत्ति तथा त्यसबाट धनजनको धेरै क्षति हुन गएको छ ।

२०७२ सालको भूकम्पपछि विज्ञ वा भूगर्भशास्त्रीहरूले अध्ययन गरेर अहिले बाढीपहिरो गएका स्थानहरू जोखिममा भएको र त्यहाँका बस्तीहरू त्यहाँबाट स्थान्तरण गर्नुपर्ने सुझाव दिएका थिए । तर सरकारले त्यतापट्टी ध्यान दिएन । त्यसको परिणाम स्वरूप नै अहिले त्यहाँ ठुलो क्षति पुग्न गएको छ ।

राष्ट्रिय जनमोर्चाको पहिलेको वक्तव्यमा स्पष्ट गरिएको छ, सिन्धुपाल्चोकमा बाढीपहिराले भएको ठुलो धनजनको क्षतिको प्रकृति पनि अहिले ढोरपाटनमा भएको बाढीपहिरोको जस्तै थियो । भूगर्भशास्त्री वा अध्ययन टोलीहरूले त्यहाँका कैयौँ बस्तीहरू जोखिममा भएको र तिनीहरूलाई स्थान्तरण गर्नुपर्ने सुझाव दिएका थिए तर सरकारले त्यहाँ पनि ध्यान नदिएको कारणले ठुलो क्षति हुन पुगेको थियो । त्यही प्रकृतिको घटना अहिले बाग्लुङ्गको ढोरपाटनमा पनि दोहोरिएको छ र त्यसका लागि मुख्य रूपले सरकार नै जिम्मेवार छ ।

देशमा सिन्धपाल्चोक वा बाग्लुङ्गको ढोरपाटनजस्ता जोखिमयुक्त बस्तीहरू अन्यत्र पनि हुन सक्दछन् । सरकारले अहिलेसम्म भएको अध्ययनको आधारमा वा आवश्यकता अनुसार अन्यत्र पनि त्यस्ता बस्तीहरूमा अध्ययन गराएर त्यस्ता जोखिमयुक्त बस्तीहरूको स्थानतरण गर्नुपर्ने आवश्यकतामा हामीले जोड दिन्छौँ । उक्त कार्य कुनै स्थानीय तहबाट हुन नसक्ने कुरा प्रस्ट छ । त्यसकारण केन्द्र सरकारले नै विस्तृत योजना बनाएर त्यस प्रकारका बस्तीहरूको अध्ययन वा स्थानतरण गर्नुपर्ने विषयमा हामीले विशेष जोड दिन्छौँ ।