काठमाडौँ । नेपालमा पछिल्लो २४ घण्टामा थप १ हजार ३५९ जनामा कोरोना भाइरसको सङ्क्रमण देखिएको छ । शुक्रबारको स्वास्थ्य तथा जनसङ्ख्या मन्त्रालयको नियमित प्रेस ब्रिफिङमा मन्त्रालयका प्रवक्ता प्रा.डा. जागेश्वर गौतमले देशभरमा थप १ हजार ३५९ जनामा कोरोना भाइरसको सङ्क्रमण पुष्टि भएको जानकारी दिनुभयो ।
प्रवक्ता गौतमका अनुसार आज सङ्क्रमित हुनेमा ४६४ महिला र ८९५ जना पुरुष रहेका छन् । योसँगै नेपालमा कोरोना सङ्क्रमितको सङ्ख्या ४४ हजार २३६ पुगेको छ ।
यस्तै, काठमाडौँ उपत्यकामा पछिल्लो २४ घण्टामा थप ४५४ जनामा कोरोना भाइरसको सङ्क्रमण देखिएको छ । प्रवक्ता गौतमका अनुसार उपत्यकाका काठमाडौँ ३८६, भक्तपुर ३६ र ललितपुरमा ३२ जनामा कोरोना सङ्क्रमण पुष्टि भएको हो ।
त्यस्तै, पछिल्लो २४ घण्टा मा थप १३ सय ५४ जना कोरोना सङ्क्रमित निको भएका छन् । योसँगै नेपालमा कोरोना मुक्त हुनेको सङ्ख्या २५ हजार ५६१ पुगेको छ ।
आज देशभर १३ हजार ६३८ जनाको पीसीआर परीक्षण गरिएको थियो ।
