दैलेख । जिल्ला लघुउद्यमी समूह सङ्घ दैलेखले २०७७ भदौ १९ गते जिल्ला प्रशासन कार्यालयमार्फत मागपत्र बुझाएको छ ।
सङ्घका अध्यक्ष कविराज खत्रीको नेतृत्वमा गएको टोलीले मागपत्र बुझाएको हो । दैलेख जिल्लाका लघु, घरेलु तथा कृषिउद्यमीका समस्याहरू तत्काल सम्बोधन गर्न प्रधानमन्त्री, कर्णाली प्रदेशका मुख्यमन्त्री, उद्योग, पर्यटन, वन तथा वातावरण मन्त्री र दैलेख जिल्लाका ११ वटै स्थानीय तहलाई मागपत्र बुझाइएको हो ।
कोभिड–१९ प्रभावितको अति उच्च जोखिमा परेको दैलेख जिल्लाका लघु उद्यमीहरू ठुलो समस्यामा परेको र सरकारले कुनै पनि राहतका लागि सहयोग नगरेको, वित्तीय संस्थाहरूले ब्याज, किस्ता मात्र असुल्न प्रयास गरेको तर ऋणलगानी नगरेको, गरिबी निवारणका लागि लघुउद्यम विकास कार्यक्रम, आयआर्जनमूलक कार्यक्रम आए पनि स्वरोजगारी सृजना गर्नेजस्ता कार्यक्रम सञ्चालन नगरेकाले मागपत्र बुझाउनुपरेको सङ्घका अध्यक्ष कविराज खत्रीले दिनुभएको छ ।
मागपत्रमा दैलेखलाई विशेष कोरना प्रभावित जिल्ला घोषणा गरी आयआर्जनमूलक कार्यक्रम लागु गर्न, लघु, घरेलु, कृषिउद्यमीबाट उठाइदै आएका सबै प्रकारको कर दुई वर्षका लागि छुट गर्न, जिल्लास्तरीय औद्योगिक ग्राम, पालिका स्तरीय औद्योगिक ग्राम, कोसेलीघर, स्थानीय कृषि उपज सङ्कलन केन्द्र निर्माण र स्थापना गर्न माग गरिएको छ । त्यसैगरी मागपत्रमा दैलेख–सुर्खेत सडकखण्डलाई स्तरोन्नति गर्न, परियोजना र ग्रामीण क्षेत्रको जग्गा धितो राखेर सुलभ ब्याजदरमा लघुउद्यमीलाई ऋण उपलब्ध गराउनसमेत माग गरिएको छ ।
अध्यक्ष कविराज खत्रीले वाचन गरेर प्रमुख जिल्ला अधिकारीलाई हस्तान्तरण गरेपश्चात प्रमुख जिल्ला अधिकारीले मागपत्र बुझ्दै यस मागपत्रलाई सम्बन्धित निकायसमक्ष पठाइने बताउनुभयो । उहाँले जिल्ला लघुउद्यमी समूह सङ्घ दैलेखले उठाएका माग जायज भएकाले ती त्यसलाई सम्बोधन गर्न आफनोतर्फबाट प्रभावकारी भूमिका निर्वाह गर्ने दावी पनि गर्नुभयो ।
