काठमाडौं । गृहमन्त्रालयले कञ्चनपुर जिल्लामा रामकुमार महतोलाई प्रमुख जिल्ला अधिकारीको जिम्मेवारी दिएर पठाएको छ । प्रजिअ नुरहरी खतिवडालाई बिहीबार मन्त्रालय तानेर गृहले महतोलाई कञ्चनपुर पठाएको हो ।
प्रमुख जिल्ला अधिकारी बनेका महतोको सफलताको कथा भने निकै रोचक र प्रेरणादायी रहेको छ । आफ्नै मेहनत र लगनले लोकसेवा आयोग मार्फत पियनबाट राष्ट्र सेवा सुरु गरेका महतो सहसचिव बन्न सफल भएका हुन् ।
महतोको सफलताको कथाबारे खोजी गरी भारतको उत्तराखण्डस्थित एक अनलाइनले समाचार प्रकाशन गरेको छ ।
‘बेवाकउत्तराखण्ड डट कम’ नामक भारतीय अनलाइन पत्रिकाले लेखेको छ, ‘कार्यालय सहायक की प्रथम नोकरी प्राप्त करने वाले राम कुमार महतो ने अपनी मेहनत के दम पर नेपाल लोक सेवा आयोग की परीक्षा को पास कर प्रशासनिक सेवा में नियुक्ति पाई थी।वही इससे पहले वह नेपाल सरकार में केंद्रीय गृह मंत्रालय में पोस्टेड थे।’
धनुषा जिल्लाको मिथिला नगरपालिका–२ स्थायी घर भएका ४१ वर्षीय महतोले चार वटा विषयमा मास्टर्स गरेका छन् । उनी पियनबाट निजामती सेवा प्रवेश गरी सहसचिव हुन सफल अपवाद व्यक्ति हुन् ।
लोकसेवा आयोगबाट सहसचिवको परीक्षा पास भएपछि रामकुमारले फेसबुकमा लेखेका छन्, ‘निष्ठापूर्वक सेवा र परिश्रम गर्दै गयो भने पद, प्रतिष्ठा र अवसर खोजी रहनु पर्दैन, आफैं आउँदो रहेछ ।’
