महेन्द्रनगर । कञ्चनपुर सदरमुकाम महेन्द्रनगरमा रहेको महाकाली अञ्चल अस्पतालमा आईसीयू र भेन्टिलेटर जडान गरिएको छ । अस्पताल स्थापनाको ५७ वर्षपछि अत्याधुनिक उपचार सघन कक्ष (आईसीयू) सेवा सञ्चालन भएको हो । आईसीयू सेवा सञ्चालनका लागि अस्पतालमा ६ बेड सहितको भेन्टिलेटर जडान गरिएकोछ ।
आईसीयू सेवा, थाईराइड मेसिन र आधुनिक एम्बुलेन्सको सोमबार प्रतिनिधी सभा सदस्य निरुदेवी पालले उद्घाटन गर्नुभयो । त्यस अवसरमा महाकाली अस्पताल व्यवस्थापन समितिका अध्यक्ष कृष्णदत्त जोशी (बोक्सर)ले अस्पताललाई थप सुधार गरेर प्रविधियुक्त बनाईने बताउनुभयो ।
लामो समय रिफर सेन्टरका रुपमा रहेको महाकाली अस्पता पछिल्लो समयमा सुधार हुँदै गएको छ । यस अघि आईसीयू सेवा सञ्चालन नहुँदा बिरामी सिमावर्ती भारतीय अस्पताल र जिल्ला बाहिर उपचारका लागि जानुपर्ने बाध्यता थियो ।
अस्पतालका निमित्त मेडिकल सुपरिटेण्डेन्ट डा. हरि कुमार श्रेष्ठले हाल ६ बेडको आईसीयू सेवा सञ्चालनमा आएको बताउँदै १० बेड पु-याईने जानकारी दिनुभयो ।
डा. श्रेष्ठका अनुसार एक महिनाको अवघिमा ४३ जना आईसीयूमा उपचार पछि निको भएर घर फर्किएका छन् । अहिले चार जनाको आईसीयूमा राखेर उपचार भईरहेको छ ।
आईसीयूसँगै थाईराइडको समेत नयाँ मेसिन प्रयोगमा ल्याइएको छ । यतै, शव बहान र आधुनिक एम्बुलेन्स पनि सञ्चालनमा ल्याइएको छ । पछिल्लो समय अस्पतालमा जनशक्तिसमेत विस्तार गरिएको छ । अस्पतालले हालै आफ्नै फार्मेसीसमेत सञ्चालनमा ल्याएको छ ।
