श्यामलाल पोखरेल,बुटवल ।
रुपन्देहीको बुटवलस्थित बेलवासमा खाद्य बैङ्क सञ्चालन गरिएको छ । हुनेले दिएर जाऊ, नहुने लगेर जाऊ भन्ने नाराका साथ सञ्चालनमा ल्याइएको यस प्रकारको खाद्य बैङ्क रुपन्देहीमा पहिलो हो ।
लायन्स क्लब अफ बेलवास सिटीले कोभिड–१९ को महामारीलाई लक्षित गरी बुटवलको बेलवासमा खाद्य बैङ्क सञ्चालन गरेको हो । स्थापनाकालदेखि सामाजिक क्षेत्रमा फरक खालको सन्देश दिँदै मानवीय सेवामा लागेको क्लबले कोराना भाइरसका कारण साँझबिहान खान समस्यामा परेको वर्ग तथा समुदायलाई लक्षित गरी खाद्य बैङ्क सञ्चालनमा ल्याइएको हो ।
बेलवास चोकमा सञ्चालनमा ल्याइएको उक्त खाद्य बैङ्कमा दैनिक उपभोग्य वस्तुहरु सङ्कलन गरी राखिएको छ । लकडाउनको समयमा खानका लागि समस्यामा परेकालाई सहयोग गर्ने गरी खाद्य बैङ्क सञ्चालन गरिएको लायन्स क्लब अफ बेलवास सिटीका प्रथम उपाध्यक्ष तथा खाद्य बैङ्क सञ्चालन कार्यक्रमका संयोजक गोविन्द खनालले जानकारी गराउनुभयो । विशेष गरेर निमुखावर्गका लागि यो खाद्य बैङ्क सञ्चालन गरी सहयोग दिन थालिएको संयोजक गोविन्द खनालको भनाइ छ । लायन्स क्लब अफ बेलवास सिटीका पूर्व र पदाधिकारी तथा सदस्यहरूले खाद्यान्न जम्मा गरेर नहुनेहरूका लागि बाँड्ने गरिएको छ ।
खाद्य बैङ्कको शुभारम्भ गर्दै क्लबका संस्थापक अध्यक्ष तथा रिजन चियर पर्सन शिवलाल उपाध्यायले कोरोना महामारीको समयमा कोही पनि भोकै बस्न नपरोस् भन्ने उद्देश्यले खाद्य बैङ्क सञ्चालन गरिएको बताउनुभयो ।
कार्यक्रममा बोल्दै क्लबका अध्यक्ष लक्ष्मणकुमार खड्काले हुनेले दिने र नहुने लिएर जाने गरी फुड एक्सचेन्जरका रुपमा क्लबले काम गर्ने बताउनुभयो ।
सामाजिक क्षेत्रमा काम गर्दै आएको क्लबले यसअघि १ हजार मास्क र सेनिटाइजर वितरण गरेको थियो । क्लबका निवर्तमान अध्यक्ष उमलाल बञ्जाडे, सहसचिव बाबु भुसाल, रामप्रसाद भुसाल, शिव खनाललगायतले बोल्दै समस्यामा परेको वर्ग तथा समुदायलाई लक्षित गरी सञ्चालन गरिएको खाद्य बैङ्क लकडाउन अवधिभर दैनिक रूपमा सञ्चालन गरेर सहयोग पुराउने प्रतिवद्वता जनाउनुभएको छ ।
खाद्य बैङ्कमा दैनिक उपभोग्य वस्तुअन्तर्गत चामल, दाल, तेल, पिठो, चिनी, नुनलगायतका सामग्रीको झोलामा प्याक गरी वितरण गर्न थालिएको छ । साँझबिहान खान समस्यामा परेकाहरूले नाम र ठेगाना दर्ता गरी सजिलैसँग खाद्यान्न लैजान पाउने व्यवस्था गरिएको छ । विशेष गरेर लकडाउनको समयमा उद्योगधन्दा, शिक्षण संस्था बन्द र अन्य निर्माण क्षेत्रका कामहरूसमेत रोकिएको अवस्थामा समस्यामा परेको श्रमिक वर्गले खाद्य बैङ्कले ठुलो राहत प्रदान गरेको छ ।
