काठमाडौँ । काठमाडौँ उपत्यकामा जारी रहेको निषेधाज्ञाको आज १२ दिन पुगेको छ । उपत्यकामा कोरोना सङ्क्रमण बढ्दै गएपछि काठमाडौँ, ललितपुर र भक्तपुरका प्रमुख जिल्ला अधिकारीसहितको बैठकले निषेधाज्ञा जारी गर्ने निर्णय गरेको थियो ।

पछिल्लो १२ दिनमा निषेधाज्ञा उल्लङ्घन गर्ने करिब १२ हजार सवारी ट्राफिक प्रहरीको कारवाहीमा परेका छन । भदौ ३ गतेबाट आजसम्म ११ हजार ७ सय ७३ सवारी कारबाहीमा परेको ट्राफिक प्रहरीले बताएको छ ।

अत्यावश्यक सेवा क्षेत्रबाहेक निषेधाज्ञाको अवज्ञा गर्ने सवारीहरूलाई होल्डमा राखेर कारबाही गर्ने गरिएको महानगरीय ट्राफिक प्रहरी महाशाखाका प्रमुख प्रहरी वरिष्ठ उपरीक्षक (एसएसपी) भीमप्रसाद ढकालले बताउनुभयो । सुरुका दिनभन्दा पछिल्लो समय नागरिक सचेतना बढेकाले अनावश्यक बाहिर निस्किनेहरूको सङ्ख्या कम रहेको उहाँले बताउनुभयो । सर्वसाधारणले निषेधाज्ञा पालना गरिरहेको उहाँले बताउनुभयो । जोखिम बढेसँगै नागरिकहरूमा सचेतना बढेको छ भने ट्राफिक प्रहरीले पनि आफ्नो सक्रियता बढाएको छ ।

प्रशासनले स्वास्थ्य, सुरक्षा, सञ्चार माध्यम, खाद्यान्न, तरकारी, फलफूल खानेपानी, दुध, इन्धन, ग्याँसलगायतका सवारीलाई निर्वाध रूपमा सञ्चालन हुन दिएको छ । सुरुमा एक साताका लागि निषेधाज्ञा जारी भए पनि सङ्क्रमण बढ्ने क्रम नरोकिएपछि थप एक साता निषेधाज्ञा थप भएको छ ।

उपत्यकाका मुख्य सडकहरूमा सवारी साधनको आवागमन न्यून देखिएको छ । सडकमा अत्यावश्यक सेवाका सवारी साधनहरू मात्रै चलेको देखिन्छ । प्रहरीले मूल सडकका मुख्य मुख्य चोकमा बसेर सवारीसाधनको चेकजाँचलाई कडाइ पारेको छ । अत्यावश्यकबाहेकका सवारी साधन चलाएमा प्रहरीले सडकमा होल्ड गरेर कारबाही गरेको देखिन्छ । उपत्यकामा जारी निषेधाज्ञा अटेरी गर्ने क्रम बढेपछि प्रहरीले चेकजाँचलाई कडाइ गरेको छ ।

उपत्यकाका भित्री सडक पनि सुनसान देखिन्छन् । बिहानको समयमा अत्यावश्यक वस्तु, तरकारी खाद्यान्नलगायतका पसलहरू खुलेका छन् । मानिसहरू अफ्नो घरनजिकको पसलसम्म पुगेर किनमेल गरेको देखिन्छ । तर दिउसो र साँझको समयमा भने कुनै पनि पसलहरू खलेको देखिँदैन ।

उपत्यकाका काठमाडौँ, भक्तपुर र ललितपुर जिल्लाका प्रशासन कार्यालयले निषेधाज्ञाको समय भदौ १७ गते मध्यरातसम्मका लागि कायम गरेका छन् ।