काठमाडौं । नेपालमा पछिल्लो २४ घण्टामा थप ८८४ जनामा कोरोना भाइरसको संक्रमण पुष्टि भएको छ । स्वास्थ्य तथा जनसंख्या मन्त्रालयको नियमित प्रेस ब्रिफिङमा मन्त्रालयका प्रवक्ता प्राडा जागेश्वर गौतमले देशभर गरेर थप ८८४ जनामा कोरोना भाइरसको संक्रमण पुष्टि भएको जानकारी दिनुभयो ।
संक्रमितमध्ये २४२ महिला र ६४२ पुरुष रहेका छन् । यो सँगै संक्रमित व्यक्तिहरूको कूल संख्या ३७ हजार ३४० पुगेको छ ।
प्रवक्ता गौतमका अनुसार नेपालमा सक्रिय संक्रमितको संख्या १६ हजार ५७८ रहेको छ। पछिल्लो २४ घण्टामा १० हजार ९७१ जनाको पीसीआर विधिबाट स्वाब परीक्षण गरिएको थियो ।
त्यस्तै पछिल्लो २४ घण्टामा नेपालमा थप ३१३ जना कोरोना संक्रमित निको भएका छन् । योसँगै निको हुनेको संख्या २० हजार ५५५ पुगेको छ ।
थप १२ जनाको मृत्यु
प्रवक्ता गौतमका अनुसार कोरोना भाइरसको संक्रमणबाट शनिबार थप १२ जनाको मृत्यु भएको छ । मृत्यु हुनेमा ३ महिला र ९ जना पुरुष रहेका छन् ।
योसँगै नेपालमा कोरोनाका कारण मृत्यु हुनेको संख्या २०७ पुगेको प्रवक्ता गौतमले जानकारी दिनुभयो ।
उपत्यकामा १८६ कोरोना संक्रमित थपिए
काठमाडौँ उपत्यकामा पछिल्लो २४ घण्टामा थप १८६ जनामा कोरोना भाइरसको संक्रमण पुष्टि भएको छ । प्रवक्ता डा गौतमले उपत्यकाका तीन जिल्लामा थप १८६ जनामा कोरोना भाइरसको संक्रमण पुष्टि भएको बताउनुभयो ।
उहाँका अनुसार उपत्यकाका काठमाडौंमा १५५ ललितपुरमा १९ र भक्तपुरका १२ जनामा कोरोना संक्रमण पुष्टि भएको हो ।
