बागलुङ । बागलुङको गलकोटमा रहेको एक विद्यालयलाई प्रवासी नेपालीले आर्थिक सहयोग गरेका छन् । गलकोट समाज जापानअन्तर्गत क्षेत्रीय समिति नागोयाले गलकोट नगरपालिका–७ मल्मस्थित सिरबारे प्राथमिक विद्यालयलाई ५० हजार रुपियाँ आर्थिक सहयोग गरेको हो ।

स्थानीय पत्रकार थम्मन थापाका अनुसार अक्षयकोषका रूपमा रहने गरी आर्थिक सहायता प्रदान गरिएको समितिका अध्यक्ष रामु थापा काजीले बताउनुभयो । समितिका पदाधिकारी, सदस्य र शुभेच्छुकबाट उक्त रकम जुटाइएको थियो । समितिको बैठकले कोरोनाका कारण तीज पर्वमा दर खुवाउनेलगायतका औपचारिक कार्यक्रम गर्न नसकिए पनि महिला र बालबालिकाका क्षेत्रमा सहयोग गर्ने निर्णय गरेको थियो ।

वि.सं. २०५३ सालमा स्थापना भएको विद्यालयनजिक दलित समुदायको बाहुल्य बस्ती छ । सो विद्यालयमा दलित समुदायका बालबालिका मात्र अध्ययनरत छन् । विद्यालयको आर्थिक स्थिति पनि कमजोर छ । विद्यालयलाई पहिलो पटक अक्षयकोषका रूपमा सहयोग आएको प्रधानाध्यापक कल्पना गौतमले बताउनुभयो ।

अक्षयकोषको ब्याजबाट बर्सेनि उत्कृष्ट विद्यार्थीलाई पुरस्कृत/सम्मान गर्ने योजना तय गरिएको सिरबारे प्राथमिक विद्यालय व्यवस्थापन समितिका अध्यक्ष छविलाल दर्जीले बताउनुभयो । कक्षा ३ सम्म पढाइ हुने उक्त विद्यालयमा अहिले १८ छात्रा र १३ जना छात्र छन् । विद्यालयमा स्थायी र राहत गरी दुई शिक्षकको दरबन्दी रहेको अध्यक्ष दर्जीले जानकारी दिनुभयो । अन्य शिक्षक र कर्मचारीको खर्च स्थानीय स्रोतबाट धानिएको गलकोट नगरपालिका वडा नं. ७ का वडाध्यक्ष सुवेदार टिकाबहादुर थापाले जानकारी दिनुभयो ।