काठमाडौं । अवकासप्राप्त वरिष्ठ चिकित्सक डा. गोविन्द केसीलाई आफू बसेको स्थानबाट बाहिर निस्किन नदिने सरकारको कार्यशैलीप्रति पूर्व प्रधानमन्त्री डा. बाबुराम भट्टराईले कडा व्यंग्य गर्नुभएको छ ।
जुम्लामा रहेका डा. केसी स्थानीयको निशुल्क स्वास्थ्य परीक्षण र उपचार गर्न आफू बसेको होटलबाहिर निस्कन खोज्दा प्रहरीले बाहिर जान नदिएको भन्दै यतिबेला चौतर्फी आलोचना भएको छ ।
सोही विषयमा डा. भट्टराईले सामाजिक सञ्जाल ट्वीटरमा लेखनुभएको छ, ‘सत्याग्रहीको माग पूरा गर्ने नगर्ने सरकारको इच्छाको कुरा हो तर सत्याग्रहमा बस्नै दिन्न भनेर बलप्रयोग गर्नु कुन ग्रहको लोकतन्त्र वा साम्यवाद हो ? डा केसी जुम्लामा सत्याग्रहमा बस्दा नेपालको संविधान/कानूनको कुन धारा/दफा उल्लंघन हुन्छ ? ओली सरकार आफ्नै छायाँदेखि किन तर्सदैछ ?’
सत्याग्रहीको माग पूरा गर्ने नगर्ने सरकारको इच्छाको कुरा हो तर सत्याग्रहमा बस्नै दिन्न भनेर बलप्रयोग गर्नु कुन ग्रहको लोकतन्त्र वा साम्यवाद हो?डा केसी जुम्लामा सत्याग्रहमा बस्दा नेपालको संविधान/कानूनको कुन धारा/दफा उल्लंघन हुन्छ?ओली सरकार आफ्नै छायाँदेखि किन तर्सदैछ?#SaveDemocracy
— Baburam Bhattarai (@brb1954) August 28, 2020
स्वास्थ्य सेवामा सुधारको माग गर्दै कैयौं पटक अनसन बसेका डा. केसी जुम्लामा पनि अनसन बस्ने तयारी गरेको र भीडभाड जम्मा गर्न लागेको भन्दै प्रहरीले उहाँको गतिविधिमाथि नियन्त्रण गरेको जनाएको छ ।
तर, डा. केसीले अहिले तत्काल अनसन नबस्ने बरु जनताको स्वास्थय सेवा गर्ने बताउनुभएको छ ।
कोरोना संक्रमणका कारण अहिले जुम्लामा पनि निषेधाज्ञा जारी गरिएको छ ।
