पोखरा । पर्वतको बिहादी गाउँपालिकाले बुधबार ११० जनाको स्वाव सङ्कलन गर्याे । गाउँपालिकाको स्वास्थ्य शाखाले जनप्रतिनिधि, स्वास्थ्यकर्मी, सवारी चालक, बैङ्कका कर्मचारी, सुरक्षाकर्मी तथा विभिन्न व्यवसायीको स्वाब लिएर प्रदेशको जनस्वास्थ्य प्रयोगशालामा पठायो । हालसम्म यस गाउँपालिकाका पाँच जनामा सङ्क्रमण पुष्टि भएको छ । ती सबै बाहिरबाट आएका हुन् ।

उनीहरू निको भइसके पनि गाउँपालिकाले प्रदेशको कोरोना टेस्ट गर्ने निर्देशिकानुसार स्वाब सङ्कलन गरेको थियो । तर त्यो निर्विवाद भने हुन सकेन । कोरोना महामारीको बेलामा वडा वडामा पुगेर कार्यकर्ता भेला गर्ने नेतादेखि अनावश्यक व्यक्तिको स्वाब लिएको भनेर विरोध भयो । स्वाब लिएकै दिन बुधबार गाउँपालिकाका एक युवा विष्णु भुसाल (वेद) ले सामाजिक सञ्जाल फेसबुकमा लेखे– “जो बोल्छ, जसको बोली काट्न गाह्रो छ, नेता हुँ भन्छ, त्यसको मात्र पिसिआर गर्ने हो ? गाउँमा गर्नुपर्दैन ? र्यान्डमली गर्नुपर्दैन गाउँमा ? छोटे राजा हो, कति मनपरि गर्छौं, सरकारी सम्पत्तिमा ? अब पालो तिमीहरूको हो अख्तियार धाउनी । कोरोनाबाट कसरी बचौँला यदि गाउँमै सङ्क्रमित छ भने ।”

उनले सामाजिक सञ्जालमा लेखेको विषयलाई गाउँपालिकाले पनि फेसबुकमै जवाफ फर्कायो– ‘मुख सम्हालेर बोल भाइ’ भन्दै । बिहादी गाउँपालिकाको आधिकारिक फेसबुक पेजमार्फत उनले लेखेको स्टाटसमा प्रतिक्रिया जनाइएको छ– “बोल्दा अलि मुख समालेर बोल भाइ । सबै र्यान्डमली नै भएको छ । घर बस्ने, अनि संसार खोक्ने ।”

गाउँपालिकाको यो जवाफको अहिले सामाजिक सञ्जालमा चौतर्फी विरोध भइरहेको छ । गाउँपालिकाको आधिकारिक फेसबुकबाट दिइएको जवाफ गैरजिम्मेवार रहेको भन्दै स्थानीय जनता, नेता तथा कार्यकर्ताले पनि विरोध गरेका छन् । यता, गाउँपालिकाका अध्यक्ष कमल भुसालले भने एक कर्मचारीले गाउँपालिकाको फेसबुक चलाइरहँदा आफ्नै व्यक्तिगत एकाउन्ट झैँ मानेर भुलवश प्रतिक्रिया दिएको जनाए ।

“मैले पनि बेहाल देखेँ । हिजो यहीँका कर्मचारीले गाउँपालिकाको फेसबुक हेर्नुभएको रहेछ । खै कसले के लेखेको रहेछ, आफ्नो एकाउन्ट झैँ मानेर प्रतिक्रिया दिनुभएछ । बाहिरकाले के के भन्छन्, सबैलाई चित्त बुझ्ने कुरा पनि हुँदैन । सबैलाई राम्रो लाग्छ भन्ने पनि हुँदैन । मैले खासै त्यस्तो नराम्रो लेखेको त होइन भन्नुभयो । गाउँपालिकाको फेसबुक पेजबाट त्यस्तो लेख्नुहुँदैन भनेको छु ।”

गाउँपालिकाले लेखेको उक्त जवाफ अहिले हटाइएको छ । तर सामाजिक सञ्जालभरि भाइरल छ । “गाउँपालिकाको धारणा होइन त्यो । आफ्ना धारणा छुट्टै हुन्छ, सबैलाई जवाफ फर्काएर त के साध्य हुन्छ र ? मैले फाल्न भनेको छु । सिस्टमको कुरा पनि त्यति जान्दिनँ । फालेका होलानु नि” उनले भने ।