काठमाडौँ । पछिल्लो २४ घण्टामा थप ७४३ जनामा कोरोना भाइरसको सङ्क्रमण पुष्टि भएको छ।
सोमबार स्वास्थ्य तथा जनसङ्ख्या मन्त्रालयको नियमित प्रेस ब्रिफिङमा मन्त्रालयका प्रवक्ता प्रा.डा. जागेश्वर गौतमले थप ७४३ जनामा कोरोना सङ्क्रमण पुष्टि भएको बताए ।
२४६ महिला र ४९७ पुरुष सङ्क्रमित भएकोमा आज १० हजार २३४ गरी ६ लाख १० हजार ४६९ जनाको पिसिआर परीक्षण गरिएको प्रवक्ता गौतमले जानकारी दिए।
१३ हजार ७१५ जना सक्रिय सङ्क्रमित रहेको प्रवक्ता गौतमले जानकारी दिए । त्यस्तै पछिल्लो २४ घण्टामा थप १७५ जना कोरोना सङ्क्रमित उपचारपछि निको भएर घर फर्केका छन् । योसँगै नेपालमा कोरोनालाई जित्नेको सङ्ख्या १८ हजार ८०६ पुगेको छ।
काठमाडौँमै थपिए २२४ नयाँ संक्रमित
काठमाडौँ उपत्यकामा पछिल्लो २४ घण्टामा थप २२४ जनामा कोरोना भाइरसको सङ्क्रमण पुष्टि भएको छ ।
सोमवार स्वास्थ्य तथा जनसङ्ख्या मन्त्रालयको नियमित प्रेस ब्रिफिङमा मन्त्रालयका प्रवक्ता प्रा।डा। जागेश्वर गौतमले उपत्यकामा थप २२४ जनामा कोरोना सङ्क्रमण पुष्टि भएको जानकारी दिनुभयो ।
प्रवक्ता गौतमका अनुसरा उपत्यकाका काठमाडौँमा १७७ जना, ललितपुरमा ३३ जना र भक्तपुरमा १४ जनामा कोरोना पुष्टि भएको हो ।
थप ८ को मृत्यु
नेपालमा कोरोना भाइरस (कोभिड—१९) बाट थप ८ जनाको मृत्यु भएको छ । स्वास्थ्य तथा जनसङ्ख्या मन्त्रालयका अनुसार आज थप ३ जना महिला र ५ जना पुरुष गरी ८ जनाको मृत्यु भएको हो ।
मन्त्रालयक प्रवक्ता डा. गौतमले रुपन्देहीमा सबैभन्दा बढी ४ जनाको कोरोनाबाट मृत्यु भएको बताउनुभयो । उहाँका अनुसार रुपन्देहीमा ३८, ५३ र ५४ वर्षीय पुरुष र ६७ वर्षीया महिलाको मृत्यु भएको हो । यस्तै सुनसरीमा ६८ वर्षीय पुरुष, मोरङमा ६५ पुरुष, पर्सामा ७० वर्षीया महिला र काठमाडौँका ४८ वर्षीया महिलाको मृत्यु भएको छ । योसँगै कोरोनाबाट मृत्यु हुनेको सङ्ख्या १ सय ५७ पुगेको छ ।
