गोविन्दकुमार शर्मा, धुन्चेबजार ।
गत भदौ १० गते भोटेकोशी–त्रिशूली नदीमा आएको विनाशकारी बाढीबाट प्रभावित रसुवाका एक सय ६३ परिवारलाई नगद राहत वितरण गरिएको छ ।
राष्ट्रिय जनमोर्चा केन्द्रीय कार्यालय र मूल प्रवाह अखिल भारत नेपाली एकता समाज केन्द्रीय समितिको संयुक्त आयोजनामा २०८३ कात्तिक २८ गते शनिबार प्रभावित बस्तीमै पुगेर नगद सहयोग हस्तान्तरण गरिएको हो ।
राहत वितरणका क्रममा बोल्दै राजमो केन्द्रीय सल्लाहकार आनन्दराज शर्माले भदौ १० को विपत्तिलाई हिमाली सुनामीको संज्ञा दिनुभयो ।
‘उक्त भयावह बाढीले थुप्रै जनधनको क्षति पुर्याएको छ’ उहाँले भन्नुभयो– ‘त्यो क्षतिको पूर्ति तत्काल गर्न नसके पनि यस्तो दु:खद् क्षणमा तपाईंहरूको शोकमा हाम्रो पार्टी साथमा छ भन्ने सन्देश दिन बस्तीमै आएका हौँ ।’
सल्लाहकार शर्माले यो रकम कुनै राज्यस्तर, विदेशी एनजिओ वा दातृनिकायबाट नभई नेपाल र भारतमा क्रियाशील श्रमजीवीले सङ्कलन गरेको स्पष्ट पार्नुभयो ।
सरकारले बिपद् राहत रकम सरकारी खातामा जम्मा गर्नुपर्ने व्यवस्था गरे पनि वास्तविक पीडितले छिटो र प्रत्यक्ष सहयोग पाउन् भन्ने उद्देश्यले बस्तीमै पुगेर नगद वितरण गरिएको उहाँको भनाइ थियो ।
अखिल नेपाल महिला सङ्घकी अध्यक्ष मीना पुनले प्रवासका श्रमिक, महिला, विद्यार्थी, युवा र साना व्यापारीले गास कटाएर पाँच सयदेखि दुई हजार रुपियाँसम्म जुटाएको रकम पीडितसम्म ल्याइएको बताउनुभयो ।
‘पीडितले आफ्नो तत्कालीन आवश्यकताअनुसार खर्च गर्न सकुन् भनेर सामग्रीको सट्टा नगद नै हस्तान्तरण गरेका हौँ’ उहाँले भन्नुभयो ।
स्थानीय तहबाट प्राप्त मृतक, घाइते र बेपत्तासम्बन्धी विवरण तथा प्रभावित परिवारको वास्तविक अवस्थालाई आधार बनाएर राहत वितरण गरिएको थियो ।
टोलीले गोसाइँकुण्ड गाउँपालिका–६ का बोकेझुन्डा, ठाडे र सोले, कालिका गाउँपालिका–१ का ग्राङ, पलेप, राम्चे तथा वडा नं. २ को गुम्बाडाँडामा राहत बाँडेको छ ।
त्यसैगरी, उत्तरगया गाउँपालिका–४ को ढुङ्गे, आमाछोदिङ्मो गाउँपालिका–२ को ग्रे तथा नौकुण्ड गाउँपालिका–६ को सस्र्युं र वडा नं. ५ को चिसीका पीडित परिवारलाई पनि नगद उपलब्ध गराइएको छ ।
दुर्गम बस्तीमा पुग्दा बाढीपीडितको अवस्था कष्टकर देखिन्थ्यो । बाढीमा आफन्त र समुदायका धेरै युवा जनशक्ति गुमाएका पीडितले मानवीय तथा भौतिक क्षतिबाट अझै सम्हालिन नसकेको र दैनिक जीवनयापनमा समेत कठिनाइ भइरहेको पीडा सुनाएका थिए ।
टाढाबाट बस्तीमै आएर दु:खमा साथ दिएकोमा टोलीप्रति आभार व्यक्त गर्दै स्थानीय पीडित मिङमर मोक्तानले भन्नुभयो– ‘घरदैलोमै आएर सहयोग गरिदिनुभयो । घरखर्चमा ठुलो राहत मिलेको छ ।’
राहत वितरण अभियानमा अखिल नेपाल जनजाति सम्मेलनका अध्यक्ष निमबहादुर बुढा, राजमो काठमाडौँ जिल्ला समितिका उपाध्यक्ष दिवाकर सुवेदी, रसुवा राजमोका नेता दाबा सोनाम लामालगायतको सहभागिता थियो ।
