बर्लिन । जर्मनीको सशस्त्र बलमा कार्यरत सैनिकमाझ गरिएको एक सर्वेक्षणले सेनाभित्र व्यापक यौन दुव्र्यवहार हुने गरेको खुलासा गरेको छ ।
रक्षामन्त्री बोरिस पिस्टोरियसले बुधबार सार्वजनिक गरेको विवरणअनुसार यसबाट विशेषगरी महिला सैनिक बढी प्रभावित छन् ।
यो सर्वेक्षण जर्मनीको सेनाले आफ्नो जनशक्ति उल्लेख्य रूपमा वृद्धि गर्न र विशेषगरी महिलालाई सेनामा आकर्षित गर्न भर्ना अभियान सञ्चालन गरिरहेका बेला सार्वजनिक भएको हो । जर्मनीको सशस्त्र बललाई बुन्डेसवेर भनिन्छ ।
मन्त्री पिस्टोरियसका अनुसार सेनामा कार्यरत ३८ प्रतिशत महिलाले मौखिक यौन दुव्र्यवहार भोगेको बताएका छन् भने १० प्रतिशतले शारीरिक यौन दुव्र्यवहारको सामना गर्नुपरेको बताएका छन् ।
उनका अनुसार कम उमेरका र तल्लो दर्जामा कार्यरत महिला सैनिकहरू यस्तो दुव्र्यवहारबाट बढी प्रभावित छन् । पुरुष सैनिकमध्ये भने विपरीत लिङ्गीप्रति आकर्षित नहुनेहरू बढी दुव्र्यवहारको सिकार भएको पाइएको छ ।
अध्ययनका लागि महिला तथा पुरुष सैनिकबाट आठ हजार प्रश्नावली भराइएको थियो । यो सङ्ख्या जर्मन सेनाको कुल जनशक्ति एक लाख ८६ हजार दुई सयको करिब चार प्रतिशत हो ।
यता ग्रिन्स पार्टीकी सांसद सारा नान्नीले यस्ता घटनाबारे उजुरी दिन सहज बनाउन स्वतन्त्र बाह्य अनुसन्धान निकाय गठन गर्नुपर्ने माग गरेकी छिन् । (रासस/एएफपी)
