काठमाडौँ । अखिल नेपाल किसान महासङ्घ (अप्फा) ले १५ दिनभित्र किसानलाई मल आपूर्ति गर्न सरकारसित माग गरेको छ । नेपाल सरकारले “धेरै प्रयत्नपछि पनि मल उपलब्ध गराउन नसकेको” जस्ता लाचारीपूर्ण अभिव्यक्ति प्रकट गरेपछि किसान महासङ्घको यस्तो प्रतिक्रिया आएको हो ।

अखिल नेपाल किसान महासङ्घ (अप्फा) का अध्यक्ष भैरवराज रेग्मीको हस्ताक्षरमा २०७७ भदौ ५ गते जारी प्रेसवक्तव्यमा यस्तो प्रतिक्रिया व्यक्त गरिएको हो । वैदेशिक रोजगारी र शहरमा बसेका लाखौँ श्रमिकसमेत गाउँमा गई बाझो जमिन जोतिरहेको परिस्थितिमा मल उपलब्ध गराउन नसक्नुलाई किसान महासङ्घले सरकारको गैरजिम्मेवार र नालायकी प्रवृत्तिको सङ्ज्ञा दिएको छ ।

यस्तो नालायकी चरित्र प्रदर्शन गर्ने कृषिमन्त्री र कृषि मन्त्रालयका कर्मचारीलाई जिम्मेवारीबाट हट्नसमेत माग गरिएको सो वक्तव्यमा अगाडि भनिएको छ–

“नेपाल सरकारले कृषि मन्त्रालयका कर्मचारी मार्फत ‘धेरै प्रयत्नपश्चात् मल उपलब्ध गराउन नसकेको’ भनेर लाचारी प्रकट गर्दै मल उपलब्ध गराउन नसक्ने आसयको वक्तव्य प्रकाशित गर्न लगाएर किसानमारा चरित्र देखाएको छ । यस प्रकारको कृषिक्षेत्रमाथि नेपाल सरकारको नालायकी र गैरजिम्मेवारीप्रति अखिल नेपाल किसान महासङ्घ (अप्फा) क्षोभ प्रकट गर्दै कृषिक्षेत्रको जिम्मेवारी बहन गर्न नसक्ने कृषिमन्त्री र कृषि मन्त्रालयका कर्मचारीलाई जिम्मेवारीबाट हट्न माग गर्दछ ।

कोभिड–१९ को महामारीबिच आफ्नो स्वास्थ्यको पनि ख्याल नगरी किसानहरूले ठुलो मिहिनेत गरी कृषि उत्पादनमा लागेका थिए । वैदेशिक रोजगरी र शहरमा बसेका लाखौँ श्रमिकहरू गाउँमा गई बाझो जमिनसमेत जोतेर कृषिउपज लगाएका थिए । तर सङ्घीय सरकार र प्रदेश सरकारको स्थानीय सरकारलाई निकम्मा बनाई कृषिक्षेत्रमा लगानी बढाई किसानलाई सहजीकरण गर्ने र त्यसको व्यवस्थापनको जिम्मेवारीबाट हटेर किसानलाई बेवास्ता गर्ने विगतको नीतिमा कुनै सुधार देखिएन ।

कृषिमन्त्रीले जतिसुकै समस्या बताए पनि नेपाल सरकारले त्यसको हल ननिकाल्नु कृषिप्रति यो सरकारको गैरजिम्मेवार र नालायकी प्रमाणित भएको छ । कृषिक्षेत्रलाई बेवास्ता गरिएको देखेपछि गाउँका किसानलाई पुनः वैदेशिक रोजगारीमा फर्काउन सरकारले पुनः जोड गरिरहेको छ । कृषिलाई बेवास्ता गरी यो सरकारको नीतिले कोभिड–१९ को महामारीबिच विकराल भोकमरी पैदा हुने निश्चित छ । अझ सङ्घीयता कार्यान्वयन गर्न भन्दै विदेशीसँग भिक मागेर सरकार चलाउनेजस्ता नालायकी चरित्र यो सरकारले देखाइरहेको छ ।

कोभिड–१९ को व्यवस्थापनसँगै कृषिक्षेत्रको समेत प्राथमिकता तोकेर कृषिक्षेत्रलाई सङ्कटकाल घोषणा गरेर १५ दिनभित्रै मल आपूर्ति गर्न माग गर्दछ ।”