काठमाडौं । काठमाडौं उपत्यकामा पछिल्लो २४ घण्टामा १५९ कोरोना संक्रमित थपिएका छन् । स्वास्थ्य तथा जनसंख्या मन्त्रालयको नियमित प्रेस ब्रिफिङमा मन्त्रालयका प्रवक्ता प्राडा जागेश्वर गौतमले उपत्यकमा थप १५९ जना संक्रमित थपिएको बताउनुभयो ।

प्रवक्ता गौतमका अनुसार काठमाडौंमा १३४, ललितपुरमा १७ र भक्तपुरमा ८ संक्रिमित थपिएका हुन् । पछिल्लो २४ घण्टामा नेपालमा थप ६८१ जनामा कोरोना भाइरसको संक्रमण पुष्टि भएको छ। यो सँगै नेपालमा संक्रमितको संख्या २८ हजार ९३८ पुगेको छ ।

प्रवक्ता गौतमका अनुसार ११ हजार ५२२ जनाको पीसीआर परीक्षण गरिएको थियो । यस्तै, पछिल्लो २४ घण्टामा १२० जना कोरोना संक्रमित उपचारपछि निको भएका छन् । योसँगै निको हुनेको संख्या १७ हजार ७०० पुगेको छ ।