काठमाडौँ । नेपाली कङ्ग्रेस संस्थापन पक्षको हालै सम्पन्न पन्ध्रौँ महाधिवेशनले नयाँ केन्द्रीय समिति चयन गरेको छ । असोज १८ गतेदेखि काठमाडौँमा सम्पन्न सो महाधिवेशनले केन्द्रीय समिति चयन गरेको हो ।
महाधिवेशनले सभापतिमा गगनकुमार थापालाई चयन गरेको छ भने वरिष्ठ उपसभापति विश्वप्रकाश शर्मालाई ।
केन्द्रीय समितिको खुल्लातर्फका उपसभापतिमा डा. चन्द्रकान्त भण्डारी र ई. मधु आचार्य तथा महिला उपसभापतिमा पुष्पा भुसाल चयन भएका छन् । त्यस्तै समावेशी उपसभापतिमा विनोदकुमार चौधरी चयन भएका छन् ।
त्यस्तै महामन्त्रीमा खुलातर्फ प्रदीप पौडेल र उदयशमशेर राणा तथा महिलातर्फ डा. डिला सङ्ग्रौला (पन्त) रहेका छन् ।
सहमहामन्त्रीतर्फ महिलामा प्रतिमा गौतम, खुल्लातर्फ रामहरि खतिवडा र अजयबाबु शिवाकोटी, आदिवासी जनजातितर्फ बहादुरसिंह लामा (तामाङ), दलिततर्फ प्रकाश रसाईली स्नेही, मधेसीतर्फ अजयकुमार चौरसिया, खसआर्यतर्फ मनोजमणि आचार्य, थारूतर्फ योगेन्द्र चौधरी, मुस्लिमतर्फ डा. मोहम्मत फिरदोश आलम, पिछडिएको क्षेत्रतर्फ जीवनबहादुर शाही र अल्पसङ्ख्यक क्षेत्रका आङगेलु शेर्पा रहेका छन् ।
कङ्ग्रेस विधानअनुसार केन्द्रीय सदस्यका विभिन्न क्लस्टर छन् । त्यसमा खुल्लामा महिला र पुरुषसँगै आदिवासी जनजाति, दलित, मधेसी, खसआर्य, थारू, मुस्लिम, पिछडिएको क्षेत्र, अल्पसङ्ख्यक अपाङ्गता, प्रदेशगत, प्रदेशगतअन्तर्गत पनि ३५ वर्षमुनिका, प्रवासी सङ्गठन, पेसागत तथा विषयगत क्षेत्र, श्रमिक, काठमाडौँ उपत्यका, प्रजातन्त्र सेनानी, सहिद परिवार, द्वन्द प्रभावित परिवारबाट केन्द्र्रीय सदस्य चयन गरिएका छन् ।
केन्द्रीय समितिमा पत्रकारिता पृष्ठभूमिबाट सहमहामन्त्री अजयबाबु सिवाकोटी र पेसागत विषयगत क्षेत्रबाट केन्द्रीय सदस्यमा बाल अधिकारी चयन भएका छन् । अधिकारी नेपाल पत्रकार महासङ्घको कावा अध्यक्षसमेत भइसकेकी छिन् ।
दुई सय ९७ सदस्यीय केन्द्रीय समितिमा निर्वाचनबाट दुई सय ३१ जना आइसकेका छन् भने चार सहमहामन्त्री, एक कोषाध्यक्षसहित ६६ जना केन्द्रीय सदस्य सभापतिले नियुक्त गर्नेछन् ।
