काठमाडौं । राजधानी शहर काठमाडौं उपत्यकामा कोरोना संक्रमण बढ्दै गएपछि चहलपहलमा थप कडाइ गरिएको छ । जिल्ला प्रशासन कार्यालय काठमाडौंले शुक्रबार सूचना प्रकाशित गरी भिडभाड हुने सबै गतिविधिलाई निषेधित गरेको छ ।
काठमाडौं जिल्लाका प्रमुख जिल्ला अधिकारी जनकराज दाहालद्वारा एक आदेश जारी शुक्रबार राती १२ बजेदेखि भदौ १५ गतेसम्म खुल्ला स्थानमा भेला गर्न, भीडभाड गर्न, सभा जुलुस गर्न, जात्रा, महोत्सव आदि गर्न निषेधित गरिएको छ।
शैक्षिक संस्थाहरु संचालन गर्न, सबै प्रकारका सभा गोष्ठी, तालिम सेमिनार, सिनेमा हल, पार्टी प्यालेस, मनोरञ्जन स्थल, सैलुन, ब्युटी पार्लर, स्पा, स्वीमिङ पुल, जिमखाना समुहमा खेलिने खेलकुद र खेल प्रस्तुति, पुस्तकालय, संग्राहलय, चिडियाखाना संचालन निषेध गरिएको छ ।
त्यसैगरी दैनिक हुने नित्य पूजा बाहेकका सम्पूर्ण धार्मिक गतिबिधिहरु, उद्योग व्यापार, व्यवसाय अन्तर्गतका स्वास्थ्य मापदण्ड विपरीतका क्रियाकलापहरु, चाडपर्व लगायतका धार्मिक सांस्कृतिक कार्य गर्नका लागि हुने जमघट पनि निषेधित गरिएको छ ।
भदौ १५ सम्म फुटपाथ, खुल्ला ठाउँ र ठेला गाडा-साइकलमा संचालन हुने बिभिन्न व्यवसाय, कवाडी संकलन गर्न, उद्योग व्यवसाय संचालनका लागि स्वास्थ्य मापदण्ड विपरीत श्रमिक, कामदारको ओसार पसार गर्न र टेक अवे बाहेक होटल, रेष्टेराँ सञ्चालन गर्न पनि रोक लगाइएको छ।
