काठमाडौं– नुवाकोटको देवीघाटस्थित तादी नदीमाथि निर्माणाधीन एक्रोब्रिज तयार भइसकेको भन्दै एआईबाट बनाइएको तस्बिर सामाजिक सञ्जालमा सार्वजनिक भएपछि भ्रम फैलिएको भन्दै आलोचना भएको छ।
भोटेकोशी बाढीले पुरानो पक्की पुल बगाएपछि विदुर–५ र बेलकोटगढी–८ जोड्ने गरी ६० मिटर लामो एक्रोब्रिज जडान भइरहेको छ। नेपाली सेनाले निर्माण थालेको पुलको काम जारी रहे पनि केही सामाजिक सञ्जाल प्रयोगकर्ताले पुल सञ्चालनमा आइसकेको जस्तो देखिने एआई तस्बिर सार्वजनिक गरेका थिए।
स्थानीय तथा पत्रकारहरूले पुल अझै पूर्ण रूपमा निर्माण नभइसकेको जनाउँदै विपद्का बेला एआईबाट बनाइएका तस्बिर प्रयोग गरी गलत सूचना फैलाउन नहुने बताएका छन्। नियमित काम भए पुल केही दिनभित्र सम्पन्न हुन सक्ने उनीहरूको भनाइ छ।
यस घटनाले विपद्का बेला एआईबाट निर्मित वा सम्पादित तस्बिर प्रयोग गर्दा वास्तविक अवस्थाबारे भ्रम सिर्जना हुन सक्ने देखाएको छ।